झाडं आणि फुटबाॅलची गट्टी जमवणारा लेसिन एक गोल केला की ११ झाडं लावतो.

लेसिनला अगदी लहान असल्यापासून निसर्गाच्या सान्निध्यात राहायला खूप आवडतं. दिवसभर घराबाहेर राहणं, खेळणं, घरी येताना हात-पाय कपडे चिखल मातीने भरवून येणं हा त्याचा लहानपणीचा आवडता उद्योग असायचा. पण म्हणून लेसिनची आई त्याला कधीच रागवायची नाही. उलट मुलगा निसर्गात रमतोय याचा तिला आनंद व्हायचा. लेसिनला अगदी चालायला यायला लागलं तेव्हापासून त्याला फुटबाॅल हा खेळही आवडू लागला.  दहा वर्षांचा झाल्यानंतर २०१२ मध्ये त्याने फुटबाॅलचं प्रशिक्षण घ्यायला सुरुवात केली. आणि नंतर तो केनियाच्या 'लिटील लीग' या संघात दाखला झाला. संंघासाठी फुटबाॅल खेळू लागला.

लेसिनला शाळेत ज्या प्रकारे हवामान बदल (क्लायमेट चेंज) याबद्दल जे सांगितलं जायचं ते अजिबात आवडायचं नाही. शिक्षक नुसती हवामान बदलाची थिअरी सांगायचे. पण त्यातून आज आपण हवामान बदल थांबवण्यासाठी काय करु शकतो हे मात्र सांगायचे नाही. शिवाय निसर्ग, पर्यावरण, हवामान याबद्दल जे काही सांगायचे ते  २००० सालापूर्वीचं सांगायचे. तेव्हाचं हावामान, निसर्गाची -पर्यावरणाची स्थिती तुलनेने चांगली होती. पण आपण आता काय करायला हवं, हे मात्र लेसिनला शिक्षकांच्या सांगण्यातून काही कळायचं नाही. आपल्या शिक्षकांनी आपल्याला काहीतरी काम करायला / कृती करायला सांगायला हवी असं वाटायचं, पण ते होत नव्हतं. त्यामुळे शाळेत क्लायमेट चेंज या विषयाशी लेसिन स्वत:ला जोडूच शकत नव्हता.