उन्हात काळ्या रंगाच्या गोष्टींचा सणसणीत चटका का बसतो?

काय कारण असेल बरं?

कुठल्याही वस्तूवर प्रकाशाचे किरण पडले की त्याचे तीन परिणाम घडतात.  प्रकाशाच्या ऊर्जेचा काही भाग परावर्तित होतो, काही भाग पदार्थातून आरपार जातो आणि ऊर्जेचा काही भाग पदार्थामध्ये शोषला जातो.

चकचकीत पृष्ठभाग असलेल्या पदार्थावरून प्रकाशाच्या ऊर्जेचा खूप मोठा भाग परावर्तित होतो. तर पारदर्शक पदार्थामधून बहुतांश ऊर्जा आरपार निघून जाते; पण काळ्या रंगाचा पृष्ठभाग असलेल्या पदार्थावर पडलेल्या प्रकाशाची ऊर्जा तात्काळ शोषून घेतली जाते.  त्यातुलनेत परावर्तित होणारी ऊर्जा मात्र फारच कमी असते. 

काळ्या वस्तूवर प्रकाश पडल्यानंतर मोठ्या प्रमाणामध्ये ऊर्जा शोषून घेतली गेल्यावर त्या वस्तूचं तपमान वाढतं. काळ्या रंगाचा पदार्थ जसा सगळ्यात जास्त प्रमाणात ऊर्जेचं शोषण करतो. तसंच जर का तो तापला तर सर्वात जास्त प्रमाणात ऊर्जा उत्सर्जितपण करतो . याच कारणामुळे तापलेल्या स्कूटरच्या काळ्या सीटवर बसण्याचा आपण प्रयत्न केला तर ती काळी सीट तापून त्यामधून झालेल्या ऊर्जेच्या उत्सर्जनामुळे आपल्याला खूप जोरात चटका बसतो. किंवा काळे कपडे घालून उन्हाळ्यात बाहेर पडलं तर अंगाला जास्त चटके बसतात.