वाळूत खेळण्यासाठी स्पेशल दिवस! किल्ले बांधा, चित्र काढा, धम्माल करा!

समुद्र किनारी गेल्यावर पाण्याशी खेळताना जितकी मजा येते तितकीच मजा वाळूत खेळतानासुध्दा येते. या वाळूत खेळण्याची मजा प्रत्येकाने कधी ना कधी नक्कीच अनुभवलेली असणार. ऑगस्ट महिन्यात ११ तारखेला संपूर्ण जग वाळूत खेळण्याची मजा अनुभवतं, हे तुम्हाला माहित आहे का? नॅशनल प्ले इन द सॅण्ड डे' या नावाने हा दिवस साजरा केला जातो. एक दिवस वाळूत राहून भरपूर खेळण्याचा, वाळूचा आनंद घेण्याचा हा दिवस. 'नॅशनल प्ले इन द सॅण्ड डे' या दिवसामागे नेमका इतिहास नाही. नेमकं कोणी कधी सुरु केलं याची तारीखवार नोंद नाही. पण २००० साली ' नॅशनल डे कॅलेण्डर ' या वेबसाइटवर अनौपचारिक दिवसांच्या नोंदीत ११ ऑगस्ट या दिवसासमोर 'नॅशनल प्ले इन द सॅण्ड डे' हे दिन विशेष नोंदलं गेलं. हा दिवस ना शासकीय आहे, ना खासगी, ना कोणत्या संस्थेने सुरु केला आहे. पण तरीही हा दिवस जगभरात साजरा केला जातो. घराच्या बाहेर पडा. मस्त वाळूत जा. वाळुचा स्पर्श अनुभवा, आनंद घ्या हा संदेश देणारा दिवस केवळ वाळूच्या सहवासाचा निखळ आनंद घेण्यासाठीच जगभरात साजरा केला जातो.