शेकडो मुलांना बालमजूर होण्यापासून वाचवणारा ओम आहे तरी कोण?

ओम प्रकाश गुर्जर राजस्थानातला मुलगा. तो जेव्हा ५ वर्षांचा होता तेव्हा तो त्याच्या कुटुंबापासून, आई-बाबांपासून वेगळा झाला. त्याला बळजबरीने शेतावर काम करायला नेलं गेलं. त्याच्या आजोबांनी शेती करण्यासाठी सावकाराकडून् कर्ज घेतलं होतं. तेच कर्ज आजोबांनंतर वडील फेडत होते. ओमचे वडील कसेबसे कर्ज फेडत होते. पण तरीही सावकाराने कर्ज फेडीसाठी छोट्याशा ओमला बळजबरीने उचलून नेले आणि शेतावर काम करण्यास लावले. पहाटेपासून संध्याकाळी सूर्य मावळेपर्यंत ओम शेतातच राबायचा. आपल्याला जेवायला मिळेल का? आपण जगू का? एवढाच प्रश्न ओमसमोर असायचा. आपल्या वयाची इतर मुलं आपल्यापेक्षा वेगळं जगतात. ती शाळेत जातात, खेळतात, त्यांना मित्र-मैत्रिणी असतात, त्यांना फक्त अभ्यास करायचा असतो या सर्व गोष्टी बालमजूर म्हणून राबणाऱ्या ओमला माहितीच नव्हत्या. ओम जसजसा मोठा होत होता त्याला आपल्यात आणि प्राण्यांमध्ये फरकच वाटायचा नाही. खेळ, शिक्षण, कुटुंब यांच्याशिवाय ओमने शेतात दिवस रात्र अल्प मजुरीवर राबत दोन वर्षं काढलीत. ओम जेव्हा ७ वर्षांचा होता तेंव्हा तो बालमजूर म्हणून राबतोय हे शांततेचे नोबेल पुरस्कार विजेते कैलास सत्यार्थी यांच्या 'बचपन बचाओ आंदोलना'च्या कार्यकर्त्यांच्या लक्षात आलं. त्यांनी पोलिसात त्या सावकाराविरुध्द ओमकडून बालमजूरी करुन घेतल्याचा गुन्हा दाखल केला. केस कोर्टात गेली. तिथे ओम हा बालमजूर असल्याचं सिध्द केलं गेलं.