पेपरच्या दिवशीच किंवा अगदी पेपर लिहिताना भीती वाटली तर काय करायचं?

परीक्षा जसजशी जवळ यायला लागते तशी अनेकांच्या मनातली भीती वाढायला लागते. मनावरचा ताण वाढायला लागतो.  अनेकजण म्हणतात की परीक्षेसाठी थोडासा ताण येणं आवश्यकच असतं. पण खरं तर ताण हा थोडा असो किंवा जास्त त्याचा वाईट परिणाम परीक्षेच्या कामगिरीवर होतो. केवळ भीतीमुळे मुलांना पेपर लिहिता आला नाही अशी उदाहरणं खूप आहेत. एकदा का मनातली भीती गेली की पेपर सोडवताना जे येत नव्हतं ते आठवायला लागतं. आता आठवून काय उपयोग, पेपर लिहिताना काय झालं होतं आठवायला? असं प्रश्न पडून स्वत:वरच चिडचिड व्हायला लागते. प्रत्यक्ष पेपर लिहिताना आठवलं नाही कारण मनात भीती होती. भीतीमुळे हे असं होणारच. त्यावरचा सोपा उपाय म्हणजे मनात भीती येवूच द्यायची नाही. आणि ती समजा आलीच तर ती पटकन घालवण्यासाठी उपाय करावेत. मनातल्या भीतीवरचे उपाय आपल्याला स्वत:लाच करावे लागणार आहेत आणि ते करणं सोपंही आहे.