हातात अभ्यासाचं पुस्तकं धरलं की झोप यायला लागते. हे असं का होतं?

नेमकं अभ्यासाला बसल्यावरच कंटाळा का येतो? एरवी झोप येत नाही पण हातात पुस्तक धरलं की झोप यायला लागते ती का? असा प्रश्न तुम्हालाही पडतो का? टी.व्ही पाहताना, मित्र-मैत्रिणींशी गप्पा मारताना, खेळताना, टाइमपास करताना आपल्याला जराही कंटाळा येत नाही. पण अभ्यास करतानाच आपल्यातली एनर्जी कुठे जाते हे मात्र कळत नाही. हे फक्त आपल्याच बाबतीत होतं असं नाही. ही गोष्ट खूप जणांच्या बाबतीत घडते. अभ्यास करताना झोप येण्यामागे मुख्यत: दोन कारणं असतात असं तज्ज्ञ सांगतात. एक म्हणजे आपल्याला अभ्यास करण्यात मुळी इंटरेस्टच नसेल, अभ्यास करण्याची आवडच नसेल तर आणि दुसरं कारण म्हणजे एका वेळी एका ठिकाणी बसून खूप वेळ अभ्यास केला तर अभ्यास करताना झोप येते. आपल्या खाण्यापिण्याच्या सवयी, अभ्यास करण्याची चुकीची पध्दत या गोष्टीही अभ्यास करताना झोप येण्यास कारणीभूत ठरतात. या प्रत्येक गोष्टीत बदल घडवल्यास अभ्यास करताना छान ताजं तवानं वाटेल आणि झोप येणार नाही. पण त्यासाठी नेमकं काय करायला हवं?