कितीही अभ्यास केला तरी तो लक्षातच राहात नाही. मी काय करु?

माइंड मॅपिंग हे स्मरणशक्ती सुधारण्याचं आणि अवघड विषयांचा अभ्यासही लक्षात ठेवण्याचं हे एक सोप्पं आणि फायदेशीर तंत्र आहे. यात दृश्य गोष्टी म्हणजेच व्हिज्युअल आणि आपल्याला जे लक्षात ठेवायचे आहे त्या माहितीचे तुकडे केले जातात आणि त्याचा संबंध व्हिज्युअलशी जोडला जातो. शब्द आणि दृश्य गोष्टी यांच्या एकत्रित संबंधाचा फायदा म्हणजे आपल्याल अभ्यासातल्या अवघड गोष्टीही सहज लक्षात राहतात. माइंड मॅपिंगसाठी एक कोरा कागद घ्याव आणि त्यावर आपल्याला जे लक्षात ठेवायचं आहे त्याचे छोटे छोटे तुकडे करायचे . हे तुकडे आपण ट्री डायग्राम काढतो तसे एकमेकांना जोडायचे. यात मुख्य मुद्दा, त्याचे उपमुद्दे आणि उपमुद्द्यांचेही छोटे छोटे मुद्दे करुन आपला आपण एक नकाशा करावा.  या माइंड मॅपिंगद्वारे एखाद्या अवघड विषयाचा अभ्यास केला जातो , तेव्हा तो पुन्हा लक्षात आणताना आपल्या डोळ्यासमोर आपण तयार केलेला ट्री ड्रायग्राम उभा राहातो. यापद्धतीने सर्व मुद्दे नीट लक्षात राहतात. इतिहास, भूगोल, विज्ञान या विषयातील अवघड मुद्यांची सविस्तर माहिती आपण माइंड मॅपिंगद्वारे दीर्घकाळ लक्षात ठेवू शकतो. माइंड मॅपिंगचा उपयोग रोज अभ्यास करताना केल्यास आपली स्मरणशक्ती १० टक्क्यांनी वाढते असं तज्ज्ञ सांगतात.