खारीपेक्षा तिप्पट असलेले शेकरु असते खादाड,भित्रं आणि लाजरंही!

पानगळी रानांपासून ते सदाहरीत अरण्यांपर्यंत अनेक प्रकारच्या जंगलांनी आपल्या महाराष्ट्राला समृध्द केलं आहे. या सगळ्या जंगलातील वन्य जिवांमधून महाराष्ट्राचा राज्यप्राणी म्हणून कोणाची निवड करायची? या अवघड प्रश्नाचं उत्तर मिळालं ते पुण्याजवळच्या भीमाशंकरच्या अभयारण्यात. या जंगलाची शान म्हणजे इथे आढळणाऱ्या जायंट स्क्विरल्स अर्थात शेकरु. तशा अगदी हिमालयाच्या पायथ्यापासून ते केरळच्या जंगलापर्यंत भारतात शेकरुच्या एकूण सात उपप्रजाती आढळतात. पण भीमाशंकर येथे आढळणारे शेकरु मात्र फक्त भीमाशंकरच्या रानातच आढळतात. 'भीमाशंकरी' अशी त्यांची वेगळी उप जात नोंदण्यात आली आहे. त्यामुळे फक्त महाराष्ट्रातच सापडणारा प्राणी म्हणून या भीमाशंकरी शेकरुची निवड राज्यप्राणी म्हणून झाली. शेकरुंना इंग्रजीमध्ये जायंट स्क्विरल्स म्हणतात ते अगदीच योग्य आहे. कारण आपण नेहमी बघतो त्या खारुताईंपेक्षा शेकरुचा आकार तिप्पट मोठा असतो. शेकरु  ४० इंच लांबीचं असून त्याची शेपूट दोन फूट लांब असते. शेकरुच्या अंगावर असलेले मऊ केसात लाल,विटकरी, तपकिरी या तीन रंगांचं मिश्रण असतं.