भूतानमध्ये ट्रॅफिक सिग्नल नाही, तरीही तिथे ट्रॅफिक जाम होत नाही!

आपण शाळेत जातो, शाळेतून घरी येतो, क्लासला जातो, आई-बाबांसोबत फिरायला जातो तेव्हा आपल्याला रस्त्यात हमखास भेटते ती म्हणजे गर्दी. वाहनांची भली मोठी रांग, जोरजोरात वाजणारे हाॅर्न्स. जिथे जिथे ट्रॅफिक सिग्नल असतात, तिथे मात्र हा गोंधळ, ही गर्दी नियंत्रित राहाते. पण जिथे ट्रॅफिक सिग्ल नाही, अशा रस्त्यांवर, चौकात लोकं कसेही गाड्या दामटतात. पायी चालणाऱ्यांचा, सायकल वर ये-जा करणाऱ्यांचा तर कोणी विचारही करत नाही. मग रस्त्यांवर अपघात, गाड्यांना धक्का लागून भांडणं ,मारामाऱ्या या गोष्टी होतातच. या सगळ्यामुळे ट्रॅफिक सिग्नल असण्याचं, रहदारीचे नियम पाळण्याचं महत्व आपल्याला पटत जातं. ट्रॅफिक सिग्नलशिवाय ट्रॅफिकला शिस्त लागणं, अपघाताचं प्रमाण कमी होणं अशक्यच आहे... हो ना? फक्त आपल्या देशात नाही तर जगभरात रस्त्यावरच्या वाहनांच्या गर्दीला शिस्त लावण्यासाठी ट्रॅफिक सिग्नलची व्यवस्था असते. पण यला एक देश अपवाद आहे बरं का? तो देश म्हणजे भूतान. जगातला हा एकमेव देश आहे जिथे कुठेही ट्रॅफिक सिग्नल नाही. आणि ट्रॅफिक सिग्नल नसतानाही तिथे रस्त्यावर वाहनं शिस्तीत चालतात. हे कसं शक्य आहे? असा प्रश्न तुम्हालाही पडला ना! भूतानमध्ये ट्रॅफिक सिग्नल नसण्यामागे विशिष्टं कारणं आहेत.