बिकीबसमुळे मुलांना शाळेत जाण्याची येतेय मजा! बिकीबस म्हणजे?

सायकलवर शाळेत जायला किती मज्जा येते ना! त्यात सोबत मित्र मैत्रिणीही सायकलवर येणारे असतील तर असं एकत्र सायकल चालवत शाळेत जायला भारी गंमत वाटते. पण शाळेत जाणारी सगळी मुलं काही सायकल चालवत शाळेत जावू शकत नाही. एकतर अनेक शाळांमध्ये इयत्ता ६-७ वी पर्यंत सायकलने शाळेत यायचं नाही हा नियम असतो. त्यानंतरही मुलं शाळेत सायकल नेवूच शकतात असं नाही. कारण आई बाबांना वाटणारी भीती. आपलं मूल रस्त्यावर सायकल नीट चालवेल ना? मस्ती तर करणार नाही, काही स्टंट तर करणार नाही? रस्तेच चांगले नाहीत, ट्रॅफिक खूप, शाळाच लांब अशा अनेक कारणांनी मुलांना इच्छा असूनही शाळेत सायकलवर जात येत नाही. मग जी मुलं सायकलवर शाळेत येतात, त्यांचा इतर मुलांना हेवा वाटू लागतो.  समजा शाळेत जाणाऱ्या सगळ्या मुलांना एकत्र सायकल चालवत शाळेत जाता आलं तर किती मजा येईल ना?  अशी मजा आपल्याला येत नसली तरी ती जगात कोणालाच येत नाही असं नाही. अशी मजा स्पेनमधील बार्सिलोना शहरातल्या मुलांना अनुभवता येते.