मोठ्यांनी सांगण्यापेक्षा आपणच आपल्याला शिस्त लावली तर?

शिस्त या शब्दाचा सर्वच मुलांना कंटाळा येतो. शाळेत शिस्त घरी शिस्त.. अभ्यास करताना शिस्त, एखादं आवडीचं काम करतानाही शिस्त. इतकंच काय तर मस्ती देखील शिस्तीने करा असं  म्हणतात मोठी माणसं. मग शिस्तीचा वीट येणारच ना! शिस्त हा शब्द कितीही वैताग देणारा वाटत असला तरी त्याआधी आपण जर 'स्वयं' हा शब्द जोडला तर त्याचा वैताग येणार नाही आणि ते नकोसेही वाटणार नाही. कारण शिस्तीची जेव्हा स्वयंशिस्त होते तेव्हा आपण अमूक गोष्टी कराव्यात, कधी कराव्यात, कशा कराव्यात हे कोणी आपल्याला दुसरं किंवा मोठ्या व्यक्ती सांगत नाही. उलट आपणच स्वत:ला ते सांगतो.  काय करायचंय, कसं करायचंय , केव्हा करायचंय हे आपलं आपणच ठरवतो. तज्ज्ञ म्हणतात की ही स्वयंशिस्त अंगी बाणवली तर अवघड विषयही सोपे होतात. अभ्यास व्यवस्थित होतो. परीक्षेत मार्क्स छान मिळतात. स्वयंशिस्त असली की अभ्यासासोबतच आवडीच्या गोष्टीही करायला मिळतात. तज्ज्ञ म्हणतात की आपल्याला जर आपल्या आयुष्यात यशस्वी व्हायचं असेल, अभ्यासासोबतच इतर सर्व क्षेत्रात प्रगती करायची असेल तर स्वयंशिस्त हवीच.