अभ्यासाचीच पुस्तकं वाचून होत नाही अवांतर वाचन कधी आणि का करायचं?

जरा वाचत जा! असं जेव्हा आपले आई बाबा आपल्याला सांगतात तेव्हा आपण काय म्हणतो? 'रोजच तर वाचतो. मराठी इतिहास, भूगोल, विज्ञानाची पुस्तकं. अजून किती वाचायला हवं!' पण हे उत्तर देताना आपण जाणून बुजून वेड घेवून पेडगावला जातो. म्हणजे आई बाबा कोणत्या अर्थाने वाच हे माहित असूनही आपण आपल्या मनातलं उत्तर देवून स्वत:ची सुटका करुन घेण्याचा प्रयत्न करतो. आपल्या आई बाबांना, शिक्षकांना आपण अभ्यासाची पुस्तकं वाचतो हे काही माहित नसतं का, तरीही ते वाचायला सांगतात. याचा अर्थ त्यांना अभ्यासाशिवायचं अवांतर वाचन म्हणायचं असतं. पण अनेकांना अवांतर वाचन का करायचं हेच कळत नसतं? जरा अवांतर वाचन केलंस तर परीक्षेत चांगले मार्क्स मिळतील असं जेव्हा मोठे म्हणतात तेव्हा अवांतर वाचनाचा आणि अभ्यासाचा काय संबंध, अवांतर वाचनाने मार्क्स चांगले कसे पडतील? असे उलट प्रश्न आपल्या मनात निर्माण होतात. आपल्याला अभ्यास खूप असतो, त्यामुळे अवांतर वाचन करायला वेळच मिळत नाही असं आपण कितीही म्हणत असलो तरी अभ्यास आणि अवांतर वाचन, अभ्यासातील प्रगती आणि अवांतर वाचन यांचा जवळचा संबंध असतो.कसा तो समजून घ्यायला हवा.