नदी डोंगरातून निघते समुद्राला मिळते. पण लुनी नदी मधेच कुठेतरी हरवते!

कोणत्याही खंडातला कोणताही देश असो,जगातलं कोणतंही राज्य, त्यातलं शहर असो किंवा जगाच्या कोपऱ्यातलं कोणला माहीत असण्याची शक्यताही नसलेलं एखादं छोटंसं गाव असो, त्यांचं अस्तित्त्व कोणत्या ना कोणत्या नदीशी, तिच्या उपनदीशी जोडलेलं असतं. निसर्गात नदीच नसती तर सजीव सृष्टी फुलू बहरुच शकली नसती. आज आपल्या देशात मोठ्या नद्यांसोबत  ४०० उपनद्या आहेत. या नद्यांमुळे प्रत्येक प्रदेशाला एक विशिष्ट ओळख मिळाली आहे. माणसं जशी दिसायला, वागा-बोलायला वेगळी असतात तशाच नद्यांचं देखील असतं. प्रत्येक नदीचं भलेही ती किती छोटी का असेना तिचं म्हणून एक वैशिष्ट्यं असतं. तिची स्वतंत्र ओळख असते. काही काही नद्या तर इतक्या विशिष्ट असतात की त्यांचं वैशिष्ट्यं ऐकणाऱ्यांसाठी आश्चर्य बनतं. आपल्याकडे अशा अनेक नद्या आहेत. त्यातली एक लुनी नदी. या नदीचं नाव ऐकलं आहे का तुम्ही? ही नदी आहे राजस्थानमधली.