वाढदिवसाला केक का कापतात? या सोप्या प्रश्नाचं उत्तर माहिती आहे का ?

प्राचीन ग्रीकमध्ये वाढदिवसाला केक कापण्याची प्रथा होती. वाढदिवसाला केक कापण्याची ही आयडिया ग्रीक लोकांना  इजिप्तमध्ये राहाणाऱ्या लोकांकडून मिळाली. .इजिप्तमध्ये फारोज यांच्या राज्याभिषेकाच्या सोहळ्याचं स्मरण हे देवी देवतांसारखं केलं जायचं. फारोज म्हणजे असा राजा जो देव आणि सामान्य जनता यांच्यातला मध्यस्थ मानला जायचा. त्यांचा  हा राज्याभिषेकाचा सोहळा म्हणजे फारोजचा वाढदिवस म्हटलं जायचं. प्राचीन इजिप्तमध्ये केक ही खूप पवित्र गोष्ट मानली जायची.  त्यांच्या देवता, राजा आणि पराक्रमी नायक यांना केकचा नैवेद्य दाखवला जायचा.  इजिप्तमधील या प्रथेतला केक हा प्राचीन ग्रीक लोकांनाही भावला. त्यांनीही आर्टेमिस या आपल्या चंद्र देवतेला केकचा नैवेद्य दाखवण्यास सुरुवात केली. ग्रीक लोक वाढदिवसासाठी जो केक करायचे त्यात ब्रेड, बिस्किटं, मध या गोष्टींचा समावेश असायचा. या गोष्टी एकत्र करुन ते भाजलं जायचं. तयार होणाऱ्या पदार्थाला ते केक नाही तर 'मेली' म्हणायचे. या केकवर मेणबत्ती लावण्याची सुरुवात मात्र ग्रीक लोकांनी केली. पूर्ण चंद्राचं प्रतीक म्हणून आपल्या आर्टेमिस या चंद्र देवतेचा गौरव म्हणून केकवर मेणबत्ती लावली जायची.