भिडू नावाच्या कुत्र्याला वाचवण्यासाठी पाहा चिल्लर पार्टीचे धम्माल मिशन!

एका महिन्यात ३१ सदस्यांचा होकार कसा मिळवायचा हा प्रश्न चिल्लर पार्टीसमोर असतो. ते वेगवेगळ्या युक्त्या लढवतात. पण कोणतीच युक्ती कामाला येत नाही हे बघितल्यावर त्यांचे प्रयत्न आणखी जोर धरतात. चिल्लर पार्टी भिडूला वाचवण्यासाठी चड्डी मार्च काढतात. यामुळे शहरातील सगळ्यांचं लक्ष चिल्लर पार्टीकडे जातं. चिल्लर पार्टीला आणि शशिकांत भिडे यांना न्यूज चॅनेल्सवाले मुलाखतीसाठी स्टुडिओतही बोलावतात. तिथे भिडे चिल्लर पार्टीला काहीबाही बोलून त्यांचं मनोधैर्य खच्ची करण्याचे प्रयत्न करतात. पण मुलं बधत नाही. ते लोकांपर्यंत त्यांना हवा तो मेसेज पोहोचवतात. लोकांमध्ये भिडूबद्दल सहानुभूती निर्माण करतात. दरम्यान महानगरपालिकेचे कर्मचारी भिडूला सोसायटीतून घालवण्यासाठी त्याच्या मागे असतात. शेवटचा एकच दिवस उरलेला असतो आणि चिल्लर पार्टीकडे ३१ सदस्यांचा होकार नसतो. आता भिडू आपल्याला कधीही दिसणार नाही या विचाराने निराश होवून मुलं सोसायटीत परत येतात. भिडूसाठी या मुलांनी शशिकांत भिडे सारख्या राजकारणी माणसाशी पंगा घेतलेला असतो. चिल्लर पार्टी आपल्या मिशनमध्ये यशस्वी होते की नाही , चिल्लर पार्टीची धम्माल, भिडू आणि फटकासाठी यामुलांनी केलेले शर्थीचे प्रयत्न यासर्वांसाठी चिल्लर पार्टी हा चित्रपट पाहायलाच हवा.