चार वर्षानंतर फु बाओ जाणार आपल्या घरी. म्हणजे कुठे जाणार?

फु बाओ ही जायंट पांडा आहे. (काळ्या पांढऱ्या रंगाचं मोठं अस्वल). फु बाओचा अर्थ नशिबवान खजिना. फु बाओचा जन्म दक्षिण कोरियातील 'एव्हरलॅण्ड झू' या प्राणीसंग्रहालयात २०२०मध्ये झाला. २०१६ मध्ये १० वर्षांची ए बाओ आणि ११ वर्षाचे ले बाओ (हे फु बाओचे आई- बाबा)चीनमधून दक्षिण कोरियात आले होते. चीन आणि दक्षिण कोरिया या दोन देशातील मुत्सुद्देगिरीचा भाग म्हणून चीनमधील जायंट पांडाना दक्षिण कोरियात पाठवण्यात आलं होतं.

चीनमधील सरकार इतर देशांबरोबर 'पांडा डिप्लोमसी'चा वापर करतं. या मुत्सुद्देगिरीतला एक नियम म्हणजे इतर देशांमध्ये पाठवण्यात आलेल्या जायंट पांडांना जेव्हा पिल्लं होतात आणि ती जेव्हा चार वर्षांची होतात तेव्हा त्यांना त्यांच्या मूळ देशात म्हणजे चीनमध्ये परत पाठवलं जातं. या नियमानुसारच फु बाओला चीनमध्ये परत पाठवलं जाणार होतं. करार, नियम एका बाजूला आणि प्रेम जिव्हाळा दुसऱ्या बाजूला. आपल्या चार वर्षांच्या वास्तव्यात फु बाओने दक्षिण कोरियातील लोकांना खूप प्रेम दिलं. लोकं खास फु बाओला भेटण्यासाठी एव्हरलॅण्ड झू मध्ये यायचे. तिला पाहून लोकं आपले दु:ख आपला त्रास विसरायचे. अनेकांना फु बाओ म्हणजे आपल्या आजारावरचं औषध वाटायची.