शाळेत गृहपाठ दिला नाही म्हणजे तुम्ही अभ्यासाला बुट्टी मारता का?

मला काय वाटतं सानिका ज्या दिवशी टीचर गृहपाठ देत नाही, त्यादिवशी त्यांची अपेक्षा अशी असेल की तुम्ही तुमचा तुमचा अभ्यास करावा. प्रत्येक वेळेस दिला तरच आणि तेवढाच अभ्यास करायचा असं नाही. तुम्हाला प्रोजेक्टचं काम दिलेलं असतं. भलेही तो प्रोजेक्ट दोन महिन्यांनी शाळेत द्यायचा असेल. पण ज्या दिवशी गृहपाठ नसेल त्या दिवशी थोडा वेळ प्रोजेक्टचं काम करावं. आपल्या डोक्यातून प्रोजेक्टच्या विषयासंदर्भात काहीनाकाही सुरु राहातं. नवीन काही सूचत. ते लिहून ठेवावं.

गृहपाठ नसेल त्यादिवशी झालेल्या अभ्यासावर नजर घालावी. त्याचं वाचन करावं. अवघड वाटलेली गणिताची उदाहरणं पुन्हा सोडवून बघावी. दुसऱ्या दिवशी शाळेत जे शिकवणार आहेत, ते वाचावे. घरात कितीतरी पुस्तकं पडलेली आहेत. हिंदी, इंग्रजी, मराठी भाषेतली गोष्टीची पुस्तकं आहेत. त्यातलं एखादं काढून वाचावं. अशा वाचनामुळे थकलेला मेंदू रिलॅक्स होतो.

चित्रं काढावं किंवा एखादी हस्तकलेची वस्तू तयार करावी. यामुळे आपला क्रिएटिव्ह मेंदू चांगला काम करतो. आपल्याला नवीन नवीन कल्पना सूचतात.