दिवाळीच्या सुटीत नुसता टी.व्ही पाहणार की काही तरी धम्माल करणार?

अनय सकाळी आंघोळ वगैरे करुन खेळायला निघाला. तो वही आणि पेन घेवून खेळायला जात आहे हे आईने बघितलं. पण ती फारच कामात असल्याने तिने तेव्हा काही अनयला विचारलं नाही. आई तू ऑफिसला जाण्याआधी घरी येतो हे सांगून अनय खेळायला निघून गेला. आईने आज हाल्फ डे घेतलेला. घरातली उरलेली आवर शिवर करायला. तिने बरं म्हणून दरवाजा लावून घेतला. सकाळी 10 वाजता खेळायला गेलेला अनय दुपारी साडे बारा वाजता घरी आला. आईचीही ऑफिसला जाण्याची तयारी झाली होती. अनयच्या हातातली वही पाहून ' आज काय अभ्यास वगैरे केला की काय तुम्ही?' आईनं विचारलं. अभ्यास नाही काही. दिवाळीचं प्लॅनिंग केलं आम्ही.  त्यादिवशी मी मोबाइल खेळत होतो तर बाबा माझ्यावर ओरडले नव्हते का?  दिवाळीच्या सुटीत नुसता टी.व्ही पाहायचा नाही आणि मोबाइल खेळायचा नाही असं बजावून सांगितलं मला. आणि आई अगं आमच्या ग्रूपमधल्या सगळ्याच मुलांच्या आई बाबांनी काहीतरी करा, नुसता टी.व्हीपुढे वेळ घालवू नका असं सांगितलं. म्हणून आज आम्ही सर्वांनी मिळून दिवाळीच्या सुटीतलं क्रिएटिव्ह प्लॅनिंग केलं आहे. आमचं परवापासूनच त्यावर डिस्कशन सुरु होतं. आज फायनली झालं!'

'भारी रे अनय. मला दाखव ना तुमचं क्रिएटिव्ह प्लॅनिंग! आई अनयवर खूष होत म्हणाली.  ' आता नाही.. बाबापण समोर हवा. तुम्ही दोघं ऑफिसमधून आल्यावर संध्याकाळी सांगतो!'  यावर आई चालेल म्हणत आणि अनयला काही सूचना देवून ऑफिसला निघाली.