कार्बन फूटप्रिंट्स म्हणजे काय? ते कमी करायचे म्हणजे काय करायचं ?

सोप्पं आहे. एक उदाहरण देते. आपलंच. पावसाळ्यात आपण जेव्हा बाहेर खेळून घरी जातो, तेव्हा आपल्याला दिसतं की घर छान आवरलेलं आहे. फरशीही स्वच्छ आहे. पण आपण तसंच पायात चपला/ बूट ठेवून किंवा पाय पायपोसण्याला न पुसता घरभर फिरुन येतो. मग काय आपले मातीचे पाय सर्व घरात उमटतात. आई चिडते. आपल्याला आपणच केलेली चूक नजरेस आणून देते. तेव्हा आपल्याला कळतं की आपल्या मातीच्या पायांमुळे घर कसं घाण झालंय ते. कार्बन फूट प्रिण्टचंही असंच असतं. कार्बन फूटप्रिण्ट्स म्हणजे आपण रोज अशा काही कृती करतो की ज्यामुळे पर्यावरणाच नुकसान होतं. शास्त्रीय भाषेत कार्बन फूट प्रिण्टस म्हणजे आपल्या कृतीतून तयार होणाऱ्या ग्रीन हाऊसचं एकूण प्रमाण. जगात अमेरिकेतल्या माणसाचे कार्बन फूटप्रिण्ट्स सर्वात जास्त आहे. अमेरिकेतला प्रत्येक व्यक्ती वर्षभरात सरासरी १६ टन म्हणजे १४,५१५ किलो कार्बन फूटप्रिण्टस तयार करतात. अमेरिका सोडून जगभरातील प्रत्येक व्यक्ती वर्षाला सरासरी ४ टन म्हणजे ३६२८. ७४ किलो कार्बन फूटप्रिण्ट्स तयार करतात. जागतिक तापमान वाढ कमी करण्यासाठी २०५० पर्यंत कार्बन फूटप्रिण्ट्सचं प्रमाण वर्षाला ४ टनावरुन २ टन म्हणजे १८१४.३७ किलोवर आणायचं आहे. २ टन कार्बन फूटप्रिण्ट्सचं लक्ष गाठणं ही सोपी गोष्ट नसली तरी अशक्य तर अजिबात नाही. आपण दिवसभरात काही गोष्टी जाणीवपूर्वक केल्यास आपण हे लक्ष गाठू शकतो.