तुडतुड्या किड्यांची ताकदवान आई, कुणाची जवळ येण्याची हिंमत नाही!

झाडांवरचे हे तुडतुडे कधी एकदम विचित्र -भयंकर दिसतात तर कधी इतके आकर्षक दिसतात की पाहाणाऱ्याला ते हातात उचलून घ्यावेसे वाटतात. तुडतुड्यांबद्दल सांगण्याची विशिष्ट गोष्ट म्हणजे त्यांचं पालकत्व. म्हणजे तुडतुडे जेव्हा आई होतात तेव्हा त्यांच्यात एक वेगळीच ताकद येते. आपल्या अंड्याकडे, अंड्यातील अळ्यांकडे, छोटुकल्या तुडतुड्यांकडे ते कोणाला जावू देत नाही आणि आपले तुडतुडे पिल्लं कुठे जाणार नाही याकडे त्यांचं अगदी बारीक लक्ष असतं. आपली बाळं मोठी होईपर्यंत त्यांची काळजी घेणं एवढंच या तुडतुडे आयांना माहीत असतं. तुडतुडे किड्यांची मादी झाडांच्य देठात आपली अंडी घालतात. अंडी घातली की त्यांचं पालकत्व सुरु होतं. आधी जिथे अंडी घातली आहे, त्या देठाला टोचून टोचून भोकं पाडतात. यामुळे अंड्यातील अळ्यांपर्यंत त्यांना पोहोचता येतं. देठांवरील छिद्रांद्वारे तुडतुडे आया अंड्यातील अळ्यांकडे लक्ष ठेवतात. आपल्या अळ्या कुठे दुसरीकडे जाणार नाही किंवा कोणी तिऱ्हाईत, अनोळखी किडा या अळ्यांपर्यंत येणार नाही, याची काळजी तुडतुडे आया घेतात. पण एवढं लक्ष देवूनही जर एखादा शत्रू अंड्यांकडे, पिल्लू तुडतुड्यांकडे फिरकलाच तर तुडतुडे आया इतकं जोरात अंग हलवतात विशेषत: पोटाकडचा भाग. यामुळे तिथे आलेला तो शत्रू किडा गांगरतो, गोंधळतो, घाबरतो आणि पळून जातो. पिल्लू तुडतुडे चांगले मोठे होईपर्यंत तुडतुडे आया त्यांच्याकडे नजर ठेवून असतात.