माझ्या मैत्रिणीने फक्त माझ्याशीच बोलायला हवं, यात काय चूक?

खरं म्हणजे मैत्री ही शाळेतली सगळ्यात भारी गोष्ट असते. आणि मित्र किंवा मैत्रीण हे जगातले सगळ्यात भारी लोक असतात. पण तरीही, या जगातल्या सगळ्यात भारी लोकांमुळे आपल्याला जगात सगळ्यात जास्त त्रास होऊ शकतो. तुम्ही म्हणाल की हे अशक्य आहे. आमचे मित्रमैत्रिणी आम्हाला कधी त्रास देऊच शकत नाहीत. ते चांगले आहेत.

तर हो, ते चांगलेच आहेत आणि तुम्ही पण चांगलेच आहात, आणि तुमचे मित्रमैत्रिणी तुम्हाला त्रास देतील असा विषयच नाहीये. विषय असा आहे की त्यांच्यामुळे तुम्हाला त्रास होऊ शकतो. कसा?

तर असा विचार करा, की समजा, तुमच्या मित्राच्या गल्लीत शेजारच्या गल्लीबरोबर क्रिकेटची मॅच आहे. तुमची आणि तुमच्या मित्राची ओपनिंग बॅट्समन म्हणून शाळेतली एकदम हिट जोडी आहे. त्याच्या गल्लीत पण तुम्ही नेहेमीच खेळायला जाता. त्यामुळे तुम्ही दोघं या मॅचमध्ये ओपनिंग बॅट्समन असणार असं तुम्ही गृहीत धरून चालता. पण प्रत्यक्षात जर का त्याने तुम्हाला टीममध्ये घेतलंच नाही तर? किंवा तुमच्या गल्लीत मॅच असतांना तुमच्या बाजूने खेळण्याच्या ऐवजी तुमचा मित्र समोरच्या टीममधील त्याच्या मित्राकडून खेळला तर? किती संताप होईल तुमचा?