हो, मला माहितीये, तुम्ही रोज व्यायाम करताहात, एकही दिवस तुम्ही व्यायामाला दांडी मारत नाहीत..पण एक लक्षात ठेवा, अति तिथे माती. एकाच दिवशी खूप आणि तोच तोच व्ययाम रोज करायचा नाही. थोडा आलटून पालटून करायचा. त्यामुळेच तर मी रोज तुम्हाला वेगवेगळे व्यायाम शिकवतेय. या प्रत्येक व्यायामाच वेगवेगळा उपयोग आहे. कुठल्या व्यायामानं तुमची ताकद वाढेल, काही व्यायामानं तुमची लवचिकता वाढेल, तर काही व्यायामानं तुमचा स्टॅमिना वाढेल.
आज आपण करू या नमस्काराचा व्यायाम.
काय म्हणता? झालाय हा व्यायाम? कालच झालाय?
पण आज मी जो व्यायाम तुम्हाला सांगणार आहे, त्याचा अर्थ नमस्कारच असला तरी कालच्यापेक्षा हा नमस्कार वेगळा आहे. काल तुम्ही आई-वडिलांना नमस्कार केला होता, आज स्वत:लाच नमस्कार करायचा आहे.
हेही वाचा!
बाय बाय करा पण हाताने नाही पायाने ! पण असं उलटं कशाला?
काय करायचं?
1. खाली ‘ढू’ वर बसा. पाठ ताठ. आता तुमचे दोन्ही पाय तुमच्या दोन्ही बाजूला जेवढे फाकवता येतील तेवढे फाकवा. पण सहजपणे जमतील तेवढेच. उगाच ताणाताणी करायची नाही आणि आपले गुडघेही उचलायचे नाहीत.
2. आता आपल्या डाव्या पायाच्या बोटांना उजव्या हाताची बोटं टेकवायचा प्रयत्न करा.
3. काय? काहींना जमतंय आणि काहींना नाही जमत? गुडघा आपोआप वर उचलला जातोय?
4. मग एक आयडिया आहे. आपल्या डाव्या हातानं डाव्या पायाची मुंडी; म्हणजे गुडघा खाली दाबून ठेवा. आता आपला उजवा हात डाव्या पायाच्या बोटांना लावायचा प्रयत्न करा. बघा, जमलं ना?
5. असंच आता उजव्या पायाची मुंडी उजव्याच हातानं दाबून धरा आणि डाव्या हाताची बोटं उजव्या पायाला लावायचा प्रयत्न करा.
असं पाच-पाच वेळा करा. सुरुवातीला थोडं जड जाईल, पण नंतर एकदम इझी वाटेल. आणि नसेल जमत एकदम भारी, तरी नो टेन्शन. लागली बेट.. तुमच्या आई-बाबांना तर तुमच्याइतकंही येत नसणार! सो, डरनेका नहीं.
या व्यायामामुळे तुमच्या सांध्यांची मुव्हमेंट चांगली होईल. तुमचं ब्लड सर्क्युलेशन वाढेल. तुमचे मसल्स रिलॅक्स होतील आणि तुम्हाला एकदम भारी वाटेल.
- तुमची ‘मुंडीदाबू’ मैत्रीण
ऊर्जा
काय वाटलं वाचून ? मजा आली? नवीन काहीतरी कळलं ?प्रश्न पडले?... लग्गेच कळवा! - कसं कळवणार ?
व्हाॅट्सॲप मेसेज करा : ९११२०५०५००
ईमेल पाठवा : urjaa.online@gmail.com
क्लिक करा, मेसेज लिहा :https://urjaa.online/contact
