अमेरिकेतील राष्ट्राध्यक्षांनाच खरमरीत पत्र लिहिणारी मारी कोपेनी आहे कोण?

शहरातील मुलं पाण्याला घाबरत होती, महिलांना पाणी म्हणजे विष वाटत होतं, हे बघून मारीला आपल्या शहरासाठी, शहरातल्या मुलांसाठी, महिलांसाठी काम करावंसं वाटलं. एवढ्या लहान मुलीचं कोण कशाला ऐकेल असंच प्रत्येकाला वाटत होतं. मारीच्या आईलाही असंच वाटत होतं. पण मारीनं प्रयत्न सोडायचे नाही, असा ठाम निश्चय केला. मारी घराबाहेर पडून लोकांशी बोलू लागली. लोकंही तिच्या बोलण्याकडे लक्ष देवू लागले. बोलणं जर शास्त्रीय माहितीवर आधारलेलं असेल, गंभीर मुद्दे मांडणारं असेल तर मोठी माणसंही लहान मुलांचं ऐकतात, हे मारीने स्वत:च्या उदाहरणाने सिध्द केले होते. मारीने फ्लिंट शहरातील पाण्याच्या प्रश्नाकडे, फ्लिंट शहरातील लोकांच्या हाल अपेष्टांकडे लक्ष वेधण्यासाठी थेट अमेरिकेच्या राष्ट्राध्यक्षांना पत्र लिहिलं. तेव्हा बराक ओबामा राष्ट्राध्यक्ष होते. तिने ओबामा यांना पत्र लिहून त्यांना फ्लिंट शहरात येण्याची, येवून तिला आणि शहरातील नागरिकांना भेटण्याची विनंती केली. ओबामांनी मारीचं पत्र वाचलं आणि ते खरोखर फ्लिंट शहरात आले, मारीला आणि शहरातील नागरिकांना भेटले. त्यांनी शहरातील पाणी वितरण व्यवस्था सुधारण्यासाठी १० कोटी डाॅलर्स मंजूर केले. नंतर मारीनं आपलं काम थांबवलं नाही. ती पूर्णवेळ कार्यकर्ता बनून काम करु लागली. फ्लिंट शहरातील पिण्याच्या पाण्याच्या समस्येसोबतच महिला मोर्चाची राजदूत झाली. शाळेतील मुलांना शाळेचं साहित्य वाटायचं काम मारी करु लागली.