१० वर्षांच्या प्रसिध्दीने लावली १ लाख झाडं. तिच्या निसर्गप्रेमाची गोष्ट.

प्रसिद्धीला केवळ एका कामात गुंतून राहायला आवडत नाही. तिला वेगवेगळ्या गोष्टी करुन पाहाव्याशा वाटतात. तिला वेगवेगळ्या क्षेत्रातलं ज्ञान मिळवायचं आहे.  तिला भविष्यात चार 'एस' वर काम करायचं आहे. साॅइल म्हणजे माती. जे आपल्या जगण्याचं मूळ आहे. माती नसेल तर आपल्याकडील साधनांना काहीच किंमत नाही. प्रसिध्दीला ही माती जपायची आहे, समजून घ्यायची आहे. दुसरा 'एस' आहे स्पिरिच्युॲलिटी. परमार्थ, अध्यात्मिकता. ती म्हणते हे सर्व आपल्यातच असतं, ते दिसून येण्यासाठी आपल्याला स्वत:ला समजून घेणं आवश्यक आहे. तिसरा 'एस' म्हणजे  सस्टॅनिबिलिटी. म्हणजे शाश्वतता. पृथ्वीची शाश्वतता जपण्यासाठी आपल्या जगण्याचा, जीवनशैलीचा विचार करणं आवश्यक आहे. आपल्या सवयी काय आहे, आपण काय घालतो, काय खातो याचा विचार करणे आवश्यक आहे. आपलं जगणं पर्यावरण पूरक करण्याचा प्रयत्न प्रसिध्दी करणार आहे आणि याबाबत ती इतरांनाही जागरुक करणार आहे. चौथा 'एस' म्हणजे स्पेस अर्थात अवकाश.  झाडं लावून आपली पृथ्वी तर तिला आधी सुरक्षित करायचीच आहे, सोबतच अवकाशात  मंगळ ग्रहावरही झाडं लावायची आहेत.