अभ्यास करायचा तर वह्या पुस्तकं लागणार, मग झाडं कशी वाचणार?

कागद बनवण्यासाही एकदा वापरलेले जुने कागद, चिंध्या आणि झाडांची खोडे उपयोगी पडतात. मात्र कागद बनवण्यासाठी मुख्यत: आपण झाडांवरच अवलंबून असतो, हे खरं आहे. 

जर जंगले असतील तर झाडं मिळतील आणि झाडं असतील तर आपल्याला त्याचे लाकूड जळणासाठी आणि कागद बनवण्यासाठी मिळणार. पण मुद्दलातच जंगले कमी म्हणून झाडं कमी आणि झाडं कमी म्हणून मग कागद, जळण आणि इतर वापरासाठीच्या लाकूड वापरावर बंधनं येणार. एका बाजूनं लोकसंख्या सातत्यानं वाढत आहे. लोकसंख्येच्या गरजा नाना प्रकारच्या असतात. त्यांना घरं, शाळा, रुगालयं, देवळं, फर्निचर, कपडे, अन्न , वस्त्र, औषधं , घरात उपकरणं अशा खूप गोष्टी लागतात आणि या सगळ्यांसाठी जंगलातून मिळणाऱ्या नाना गोष्टी लागतात. तेव्हा जर कोणत्याही विकासासाठी जंगलाखालची जमीन वापरायची असेल तर जंगले नष्ट करताना जेवढी झाडं कापली तेवढी झाडं आपण रिकाम्या जागांवर लावली पाहिजेत. खरं म्हणजे कापलेल्या झाडांच्या संख्येच्या दुप्पट संख्येनं झाडं लावली पाहिजेत. कारण लावलेली सगळीच झाडं जगत नाहीत.