हारण्या-जिंकण्यापेक्षा खेळण्याचा आनंद देणारा विटी दांडू कसा खेळायचा?

विटी -दांडू कसा खेळणार?

आता खेळ म्हटल की पहिलं  कुणावर राज्य हे तर ठरवलंच पाहिजे. मग त्यासाठी आम्ही एखादी चपटी दगडाची खापरी घेवून ओली सुखी करायचो. म्हणजे खापरीला एका बाजूने थुंकी लावून ती ओली करायचो आणि हवेत उडवायचो. म्हणजे आपला टाॅस करायचो.  जो खेळाडू किवा टीम हा टाॅस जिंकेल तो पहिल्यांदा खेळेल असा नियम.

जमिनीवर छोटासा खड्डा खोदून  त्यावर विटी ठेवायची. विटी साठी केलेल्या खड्ड्याला गल किंवा गली म्हणतात. एक खेळाडू छोट्या खड्यावर  आडवी विटी ठेवून खड्यामधून विटी दांडूने दूर ढकलतो त्या वेळेस बाकीचे सर्व खेळाडू मैदानात विटी झेलण्यासाठी उभे असतात.जर कोणत्याही खेळाडूने विटी झेलली तर विटी मारणारा खेळाडू बाद होतो. विटीचा झेल घेता आला नाही,तर मग त्या गलवर दांडू आडवा ठेवायचा. मग प्रतिस्पर्धी खेळाडू त्याला विटीने मारण्याचा प्रयत्न करतात. जर दांडूला विटी लागली तर खेळाडू बाद. तो बाद झाला नाही तर मग त्याने पुन्हा राज्य घेवून विटीने गुण मिळवायचे.

यासाठी विटीच्या एका टोकावर दांडू मारून ती विटी हवेत उडवायची आणि जमिनीवर पडू न देता वरच्यावर उडवत राहायची.  विटी केवळ दांडूच्या सहाय्याने हवेत उडवणं हे या खेळातलं सगळ्यात मोठं कसब असतं.त्यानंतर दांडूच्या सहाय्याने विटी बॅटने बॉल मारतो त्याप्रमाणे दूर भिरकवायची. ती जिथे पडेल तिथे जाऊन पुन्हा ती दूर भिरकवायची. तिथून पुन्हा त्या खेळाडुंनी विटी फेकायची जर विटी दांडूला लागली तर खेळाडू बाद होतो.