सुटीचा मूड घालवण्यासाठी आहे आनंदी शेड्यूलची युक्ती!

हे फक्त या तिघांच्याच बाबतीत होतंय असं नाही. ही तर फक्त उदाहरणं. अशी खूपजणं आहेत ज्यांचा सुटीचा मूडच जात नाहीये. सुटी संपून आपली शाळा सुरु झाली आहे, आपण लवकर उठायला हवं, टीव्ही कमी पाहायला हवा, खेळण्याची विशिष्ट वेळ ठरवायला हवी हे अनेकांना अजून पटतच नाहीये.

पण असं करुन कसं चालेल. प्रत्येक गोष्टीची सुरुवात असते तसा शेवटही असतो, हे आपल्याला माहीत आहे ना. आपल्याला एखादा सिनेमा कितीही आवडला तरी तो दोन अडीच तासात संपतोच ना. आपल्याला आवडला म्हणून तो सुरुच राहातो असं नाही आणि आपणही सिनेमा आवडला म्हणून थिएटरमध्येच बसून राहातो असं नाही. परीक्षा सुरु होतात तशा संपतातही. शाळा सुरु होते तशी शाळेला सुटीही लागते. आणि शाळेची सुटी  संपतेदेखील. सुरु होणं आणि संपणं हे एक चक्र असतं. एक प्रवास असतो. ज्यातून आपल्याला जावंच लागतं. या चक्रातून लहानांना जसं जावं लागतं, तसे मोठेही जातातच. मोठेही आपल्या कामाला अधून मधून सुटी घेतात. सुटीच्या काळात मजा करतात आणि काम सुरु झालं की आपलं नेहेमीच रुटीन पुन्हा सुरु करतात. मोठे यासाठी आपलं घरातलं काम, ऑफिसचं काम आणि आपल्या आवडीचं काम याचं एक शेड्यूल आखतात. म्हणजे वेळापत्रक तयार करतात. त्यामुळे मोठी माणसं काम करुनही आनंदी असतात. मग आपणच का असं सुटीच्या मूडमध्ये अडकून मोठ्यांची बोलणी खायची? आपणही सुटीच्या मूडमधून बाहेर पडायला हवं ना! माझ्याकडे चांगला उपाय आहे, सांगू का?