उन्हाळ्यात भर उन्हात प्राणी -पक्षी- झाडांना त्रास होतो की मजा वाटते?

ओलसर भागातला उन्हाळा

उन्हाळा म्हणजे उष्णता. ही उष्णता पर्यावरणासाठी शाप आणि वरदान  अशी दोन्हीही प्रकारे काम करते. उन्हाळ्यातील उष्णता प्राणी आणि वनस्पती यांना जगण्यासाठी आवश्यकच असते. उलट वनस्पतींच्या जगात तर सूर्यप्रकाश मिळवण्याची स्पर्धाच लागलेली असते. उष्णकटिबंधीय प्रदेशातील परिसंस्थेत झाडं, झाडांची छोटी छोटी रोपं ही सूर्याचा प्रकाश मिळवण्यासाठी आपल्या पानांना, फांद्यांना सूर्य प्रकाशाच्या दिशेने ताणतात. ज्या लहान रोपांना, झुडपांना उन्हाळ्यात पुरेसा सूर्यप्रकाश मिळत नाही, जी सावलीतच राहतात  ते रोपं, झुडुपं मरुन जातात.

वनस्पतींप्रमाणे प्राण्यांवरही उष्णतेचा परिणाम होतो. ओलसर वातावरणात उन्हाळ्यातील उष्णतेमुळे जिवाणू, लहान सहान कीटक यांच्यावर विशेष परिणाम होतो.  उन्हाळ्यात त्यांची संख्या वाढते.या किटकांच्या अंड्याची टिकून राहाण्याची क्षमता वाढते . त्यामुळे उन्हाळ्यात लहान प्राण्यांना खायला मिळेल असं खाद्य पुरेसं वाढतं. उन्हाळ्यामुळे अशी परिसंस्थेतील अन्नसाखळी मजबूत होते.