स्क्रीनचं व्यसन टाळण्यासाठी स्क्रीन टाइम किती असायला हवा?

आता या व्याख्येचा विचार केला तर आपल्या लक्षात येईल की आपण आपला स्क्रीन टाईम मोजताना हे सगळे भाग मोजत नाही. आपण काय विचार करतो? तर इन्स्टाग्राम, व्हाट्सअँप आणि इतर सोशल मीडिया साईट्स. त्याशिवाय आपण जे गेम्स खेळतो ते. त्यात आपण जेवढा वेळ घालवतो तोच आपला स्क्रीनटाईम आहे असं आपल्याला वाटतं. पण प्रत्यक्षात मात्र घरात कोणीतरी टीव्ही लावला म्हणून आपणही एखाद दोन सीरियलचा एपिसोड बघतो. थोड्या बातम्या बघतो. एखादा रिऍलिटी शो किंवा गाण्यांचा कार्यक्रम किंवा डान्स शो बघतो. तोही सगळा स्क्रीनटाईमच असतो. आपण शाळेत दिलेला अभ्यास करण्यासाठी इंटरनेट वापरतो, अभ्यासासाठी एखादं अँप वापरतो तोही सगळं स्क्रीनटाईमच असतो. असा जर आपण विचार केला तर आपण दिवसातला जागेपणीचा बराचसा वेळ कुठल्या ना कुठल्या स्क्रीनसमोर असतो असं आपल्या लक्षात येतं. पण प्रत्यक्षात मात्र आपण स्क्रीनसमोर वेळ घालवत असतांना आपल्याला त्याची जाणीव होत नाही.

एरवी आपण एखादी गोष्ट, एखादी कृती अमर्याद वेळ करू शकत नाही. कारण आपल्याला ते शक्य नसतं. व्यायाम, अभ्यास, वाचन, गप्पा मारणं, एखादं काम करणं यापैकी काहीही आपण करत असलो तरी आपलं वेळेचं भान सहसा सुटत नाही. आपण अगदी एखाद्या पुस्तकात गुंग होऊन गेलो तरी ते पुस्तक कधी ना कधी संपतं. पण स्क्रीनच्या बाबतीत तसं होत नाही. कारण स्क्रीन या प्रकारचे गुणविशेष तसे आहेत. आणि म्हणूनच स्क्रीनचं व्यसन लागू शकतं.