घरी बसून बघा जंगलातली सकाळ? काय घडतं जंगल उठतं तेव्हा?

फ्लाॅवर्स ॲण्ड ट्रीज या ॲनिमेशन फिल्ममध्ये झाडा फुलांची पक्षी किटकांची गोष्ट आहे. या गोष्टीत आनंद, राग, संकट, पळापळ, सकंटाविरुध्द लढणं आणि पुन्हा झाडा फुलांचं पक्षी किटकांचं एकत्रित शांत आणि आनंदी जगणं असं सर्व काही आहे.

फिल्मची सुरुवात होततीका प्रसन्न सकाळने. सूर्य उगवतो. झोपलेली झाडं उठू लागतात. आळस झटकतात. कोणी व्यायाम करत तर कोणी झऱ्यातल्या पाण्यानं चेहेरा धुवून प्रसन्न होतं. एक आजोबा झाड आपल्या अंगा फांद्यावर पक्ष्यांना घेवून छान संगीत वाजवत सगळी सकाळ प्रसन्न करतात. तिथे दोन तरुण झाडं असतात. एक पुरुष आणि एक स्त्री झाड. त्या दोन झाडांचं एकमेकांवर प्रेम असतं. पण त्या सुंदर स्त्री झाडानं आपल्याकडे पाहावं , आपली दखल घ्यावी असं एका वठलेल्या, निष्पर्ण झालेल्या झाडाला वाटत असतं. पण तसं काही होत नाही. आणि मग ते झाड चिडतं. क्रोधाने पेटून उठतं. आग लावतं. आग झरझर पसरायला लागते. झाडं घाबरतात, पक्षी, किटक सैरावरा पळत सुटतात. अख्खं जंगल कवेत घेवू पाहणाऱ्या आगीला विझवण्यासाठी पक्षी किटक आपली ताकद आणि कौशल्य पणाला लावतात. आग विझते आणि ज्या झाडामुळे ती आग लागते ते झाड जळून जातं. मग सगळीकडे आनंदी आनंद होतो. प्रेम करणाऱ्या त्या दोन झाडांच्या आनंदात सगळी झाडं, फुलं, पक्षी, किटक गुंग होवून जातात.