आपल्यालाही व्यायामाच्या प्रेमात पाडतील असे योग करणारे हत्ती!

नको जास्त व्यायाम करु फक्त ५ सूर्यनमस्कार तरी रोज घाल. असं  आपले  आई-बाबा आपल्याला रोज सांगतात, पण आपण मात्र ढिम्म असतो. अजिबात ऐकत नाही. व्यायाम करायचा म्हटला की रोज बहाणे शोधून काढतो. पण तुम्हाला जर एका प्राणिसंग्राहालयातल्या हत्तींचं उदाहरण दिलं तर तुम्हाला रोज दहा मिनिटं का होईना पण व्यायाम करण्याची प्रेरणा मिळेल.

हत्तींमुळे व्यायामाची प्रेरणा.. ती  बरं कशी? तर हे हत्ती रोज स्वत: योग करतात, न चुकता.  दिवसातून एकदा दोनदा नव्हे तर अनेकवेळा हे हत्ती योगचा सराव करतात. हे वाचून कौतुकच वाटलं असेल ना या हत्तींचं. हे असे योग करणारे हत्ती कुठे असतात बरं? तर हे हत्ती आहेत अमेरिकेतील टेक्सास राज्यातील हाॅस्टन झू मधील.

या हाॅस्टन झू प्राणिसंग्राहालयाचा परिसर ५५ एकरचा भला मोठा आहे. इथे ६०० प्रजातींचे ६००० प्राणी आहेत. या प्राणिसंग्राहालयाला दरवर्षी लाखो पर्यटक भेट देतात. हाॅस्टन झू मधील  योग करणारे १२ आशियाई हत्ती  हे पर्यटकांचं लक्ष आपल्याकडे वेधून घेतात. इतकंच नव्हे तर योग करतानाच्या या हत्तींच्या व्हिडीओनांही सोशल मीडियावर खूप व्ह्यूज आणि लाइक्स मिळतात. न चुकता दिवसातून अनेक वेळा योग करणारे हे हत्ती आहेतच मुळी गुणाचे.