छान दिसणारी फुलपाखरं विषारीही असतात हे माहिती आहे का?

जगातली विषारी फुलपाखरं

पॅपिलियो ॲण्टिमॅचस

हे फुलपाखरु 'जायण्ट आफ्रिकन स्वॅलोटेल' या नावानंही ओळखलं जातं. हे खरोखरं मोठं असतं. त्यांच्या पंखांचा विस्तार ७.१ आणि ९.८ इंच असतो. ही फुलपाखरं आफ्रिकेच्या वर्षावनात (रेनफाॅरेस्ट) आढळतात. या फुलपाखरांची अळी स्ट्रोफानथस ग्रेटस नावाच्याच्या विषारी वनस्पतीवर जगतात. या झाडाची फुलं खूप अतिशय सुंदर असतात. या झाडात ओवाबेन नावाचं विष असतं. हे विष फुलपाखरांच्या टोकदार सोंडेत असतं. हे विष हिप्पोपोटॅम्स सारख्या मोठ्या प्राण्यालाही आजारी पाडण्याइतकं जहरी असतं. या फुलपाखरांमध्ये जे विष असतं यामुळे त्यांचं केवळ संरक्षण होतं असं नाही तर या प्रजातीतील फुलपाखरांना सुंदर रंगही या विषारी घटकामुळेच प्राप्त होतो.

बर्डविंग बटरफ्लाय

पृथ्वीवर जी काही मोठी फुलपाखरं आहेत, त्यात बर्डविंग बटरफ्लायही येतात. ही फुलपाखरं आशिया, ऑस्ट्रेलिया, आग्नेय आशियातील पर्जन्यवनात आढळतात. या फुलपाखरांच्या अळ्या पाइपवाइन आणि बर्थवर्ट सारख्या विषारी वनस्पतींवर वाढतात. अळ्या विष त्यांच्या मणक्यामध्ये साठवतात तर या अळीचं फुलपाखरु होतं तेव्हा हे विष फुलपाखरांच्या पाठीत असतं. या विषामुळे ही फुलपाखरं गडद रंगाची होतात. यामुळे त्यांची शिकार करु इच्छिणाऱ्या किटकांना- पक्ष्यांना हे फुलपाखरु विषारी आहे हे कळतं.

काॅमन इंडियन क्रो

आशिया, आस्ट्रेलिया, उत्तर आणि दक्षिण अमेरिकेत ही फुलपाखरं आढळतात. ओलेंडर, मिल्कवीड सारख्या विषारी वनस्पतींमधून या फुलपाखरांमध्ये विष येतं. या फुलपाखरांची शिकार करण्याचा प्रयत्न जर किटकांनी आणि पक्ष्यांनी केला तर ही फुलपाखरं अतिशय उग्र द्रव शरीरातून सोडतात, त्यामुळे शिकारी त्यांना सोडून दूर पळतात.

 अटाला बटरफ्लाय

ही फुलपाखरं छोटीशी असतात. नर फुलपाखरांचा पोटाकडील भाग एकदम लाल रंगाचा असतो. या फुलपाखरांच्या पंखांचा रंगही भडक असल्याने इतर किटकांना, पक्ष्यांना हे फुलपाखरं चवीला एकदम वाईट आहे, याची आगाऊ सूचनना मिळते आणि ते या फुलपाखरांच्या वाट्याला जात नाही.

क्वीन बटरफ्लाय

क्वीन बटरफ्लाय हे नावाप्रमाणेच मोठं आणि अतिशय देखणं फुलपाखरु आहे. नारिंगी-तपकिरी रंगांच्या पंखांवर पांढरे ठिपके असतात. आणि पखांच्या कडा काळ्या असतात, त्यामुळे या फुलपाखराचे पंख चमकदार दिसतात. ही फुलपाखरं उत्तर आणि दक्षिण अमेरिकेत आढळतात. ती दलदलीत, जंगलाच्या कडेला किंवा अगदी वाळवंटातही आढळतात. विन आणि डाॅगबेन नावाच्या विषारी वनस्पतींवर या फुलपाखरांची अळी वाढल्याने ही फुलपाखरं विषारी असतात.

द पोस्टमन

पोस्टमन नावाचं हे फुलपाखरु परागकण गोळा करत नाही, तर खातं. या फुलपाखराची अळी पॅशनफ्लाॅवर नावाची विषारी वनस्पती खाते. पोस्टमनची नक्कल विषारी नसलेले फुलपाखरं करतात. या पोस्टमन फुलपाखरांसोबत तीही उडतात आणि शिकारी पक्षी आणि किटकांपासून स्वत:चं संरक्षण करुन घेतात. ही फुलपाखरं मध्य अमेरिकेत आणि दक्षिण ब्राझिलमध्ये आढळतात.

पाइपविन स्वॅलोटेल

चमकदार , तेजस्वी दिसणारी ही फुलपाखरं विषारी असतात. या फुलपाखरांचे पंख वरुन तर सुंदर दिसतातच पण त्यांच्या पंखाचा आतील भागही सुंदर दिसतो. पाइपविन ही विषारी वनस्पती असते. या फुलपाखरांची अळी या विषारी वनस्पतीवर पोट भरते , त्यामुळे ही फुलपाखरं विषारी होतात.

झेब्रा लाॅंगविंग

ही फुलपाखरं खूप जगतात आणि त्यांच्या पंखाचा विस्तारही मोठा असतो. ही फुलपाखरं विषारी फुलांमधील परागकण खातात तसेच या फुलपाखरांची अळी पॅशन फ्लाॅवर या विषारी वनस्पतीचं सेवन करते. त्यामुळे हे फुलपाखरु विषारी होतं. या फुलपाखरांच्या पंखांवर झेब्र्याप्रमाणे पट्टे असतात, म्हणून या फुलपाखरांना झ्रेब्रा लाॅॅंगविंग असं म्हणतात.

रेड लेसविंग

ही देखणी फुलपाखरं आशिया आणि आग्नेय आशियात आढळतात. या फुलपाखरांच्या पंखांचा रंग नारिंगी, काळा आणि पांढरा असतो. या फुलपाखरांच्या पंखाच्या वरील भागापेक्षा पंखांचा आतील भाग जास्त सुंदर असतो. या फुलपाखराची अळी पॅशनफ्लाॅवर या विषारी वनस्पतीवर वाढते. या फुलपाखराच्या मणक्यात विष असतं.

मोनार्च

ही फुलपाखरं त्यांच्या सौंदर्यामुळे जगभरात प्रसिध्द आहेत. शिवाय ही फुलपाखरं दूरवर स्थलांतर करतात आणि महत्त्वाचं म्हणजे विषारीही असतात. हे फुलपाखरं आपली अंडी मिल्कवीड या विषारी वनस्पतींवर घालतात. त्यामुळे त्यांच्या अळ्या या वनस्पतीवरच वाढतात. अळी या वनस्पतीतील विष शरीरात साठवते आणि अळीचं जेव्हा फुलपाखरु होतं, तेव्हा हे विष या फुलपाखराच्या पंखात आणि पोटाकडील भागात असतं.