तणमोर नाचत नाही तर टणाटणा उड्या मारतो. ते का?

तणमोराची मादी उघड्या जमिनीवर ४ ते ५ अंडी घालते. या अंड्यांमधून २१ दिवसांमध्ये पिले बाहेर येतात. तणमोराचे घरटे अगदीच उघड्या जमिनीवर असल्यामुळे त्याच्या अंड्यांना, पिलांना सतत धोका असतो. तणमोराची अंडी पळवली जाणं, पिलं पळवणं, तणमोराचीच शिकार होणं, तणमोरांचा अधिवास झपाट्याने नष्ट होणं, भटक्या कुत्र्यांचे हल्ले यामुळे तणमोरांची संख्या झपाट्याने घसरत आहे. २००० साली भारतामध्ये ३६०० तणमोर होते असं सांगितलं जातं. पण जुलै २०१८ मध्ये झालेल्या अभ्यासात भारतात चार राज्यांमध्ये केवळ २६४ तणमोर शिल्लक राहिल्याचे स्पष्ट झाले आहे. जगभरात २०१७ मध्ये केवळ १००० तणमोर होते.

तणमोर १२ ते १३ वर्षं जगतात. पर्यावरण आणि त्यांना मिळणारा आहार यावर त्यांचं आयुष्य अवलंबून असतं. पूर्वी पोस्टाच्या तिकिटांवर या वैशिष्ट्यपूर्ण तणमोराचे चित्र होते. निसर्गावर, प्राणी -पक्ष्यांवर मनापासून प्रेम करणाऱ्या कोणालाही तणमोराला एखाद्या चित्रात पाहाण्याऐवजी प्रत्यक्ष निसर्गात पाहायला आवडेल. उड्या मारताना दिसला तर भारीच!