आपण शेतकरी बनण्याचा अनुभव घ्यायचा का? त्यासाठी काय करायचं?

आपल्या गॅलरीतल्या किंवा अंगणातल्या एखाद्या कुंडीत आपण कुठल्याही भाजीचं बी पेरु शकतो किंवा रोप लावू शकतो. आता कोणत्या भाजीच्या बिया असतात आणि कोणत्या भाजीची रोपं असतात? ती कुठे मिळतात, बी पेरण्यासाठी किंवा रोप लावण्यासाठी कुंडी कशी तयार करायची याबाबत तुम्ही तुमच्या घरातल्या मोठ्यांची मदत घेवू शकतात. हे एकदा नीट समजून घेतलं की आपणही भाजीचं बी पेरायचं किंवा रोप लावायचं. त्यांना वेळच्या वेळी खत द्यायचं, त्याला किड लागणार नाही, याची काळजी घ्यायची. पुरेसं पाणी आणि सूर्यप्रकाश द्यायचा. आपल्या रोजच्या कामासोबत आपण पेरलेल्या बी कडे/ रोपाकडे जबाबदारीनं लक्ष द्यायचं. झाडाला फळधारणा कशी होते, भाज्या कधी तयार होतात हे सर्व बारकाईनं पाहायचं. असं करता करता एक दिवशी आपण पेरलेल्या भाज्या तयार होतील. आपण पेरेलेल्या बी तून तयार झालेली भाजी पाहून आपल्याला किती आनंद होईल ना.. अगदी शेतकऱ्याला होतो तसा आनंद होईल आपल्याला. भलेही कुंडीत मिरचीचं रोप लावलेलं असू देत पण आपण लावलेल्या मिरचीची चव कशी लागते किमान एवढं तर नक्कीच अनुभवता येईल ना!