पावसाळ्यात रस्त्यात चिखल दिसल्यावर तुम्ही काय करता?

महाराष्ट्रात पावसाळा येऊन दाखल झाला त्याला आता काही दिवस झाले. तुमच्याकडेही पाऊस सुरू झाला असेल. त्यामुळे उकाडा कमी झाला असेल, आपण निबंधात लिहितो तसं सगळा निसर्ग हिरवागार वगैरे व्हायला लागला असेल, पण…

हा निसर्ग हिरवागार होण्यापूर्वी सगळीकडे जो भयंकर चिखलराडा होतो, त्याचे दिवस आत्ता सुरू आहेत. तर, या काळात माझा प्रश्न असा आहे, की या सॉलिड चिखलातून तुम्ही कशी वाट काढता? म्हणजे कसं सांगू का? चिखलातून मार्ग काढण्याच्या दोन तीन पद्धती असतात. त्यातली पहिली पद्धत म्हणजे रस्त्यावर चिखल आहे याची कुठलीही दखल न घेता सरळ त्यातून चालत जाणारे वीर. हे जगातील सगळ्यात सुखी जीव असतात. यांच्या पाठीवर कायम चिखलाच्या ठिपक्यांची रांगोळी असते. पण त्याचं त्यांना काहीच वाटत नाही. घरी गेल्यावर त्यांचे कपडे आणि त्यातील पोरगं यांची एकदमच धुलाई होत असणार ते सोडा. पण या लोकांना चिखल दिसतच नाही.