घरातल्या घरात करा निसर्ग सफर.. आपल्या घरातच दडलंय डिस्कव्हरी चॅनल!

सुरु करा घरातलं डिस्कव्हरी चॅनेल

आपण टीव्हीवर कायम डिस्कव्हरी वगैरे चॅनल बघतो. तिथे मोठाले कॅमेरे, दुर्बिणी पाहून अवाक होतो. परंतु, आपल्या घरातच किती सुंदर डिस्कव्हरी चॅनल सुरु आहे, ते मनभरून बघतो का कधी आपण? कधी निवांत बसून त्या मुंग्यांचा मागोवा घ्यायचा. कुठे जातात त्या, कुठून येतात. काय जमा करत असतात? कशा जातात? घरात जाळी जळमटी लागतात ती कोळ्यांमुळे. त्यांचे किती प्रकार आहेत पृथ्वीवर? त्यातले आपल्या घरात किती आहेत? कसे दिसतात ते नेमके? किती पाय आहेत त्यांना? त्यांच्या पायांवर काही रंगीत डिझाइन असतं का? ते विषारी असतात की कसं? एखादी पाल कोळ्याच्या जाळ्यात अडकलेली दिसते का? पाळी भिंतीवर कसं काय चिकटून चालू शकतात? त्या काय खात असतात आपल्या घरात? झुरळं पाहून लगेच पळापळ करण्यापेक्षा बघू तरी झुरळ नेमकं कसं दिसतं. त्याला पाय किती, त्याचे पंखांचे रंग कसे? ते उडतं का? झुरळ रात्रीच का बाहेर निघतात जास्तकरून? काय खात असतील ते आपल्या घरात? त्यांना थेट हिट मारून मारण्यापेक्षा आधी त्यांचे अड्डे कुठे आहेत घरात, त्यात अंडी आहेत का, ती कशी दिसतात, हे बघायची संधी तर घेऊ.