वातावरणातला त्रासदायक ग्रीन हाऊस इफेक्ट कसा वाढला ?

पृथ्वी, पृथ्वीवरचे जीव, वनस्पती टिकवून ठेवण्यात ग्रीन हाऊस गॅसेसची भूमिका खूप महत्वाची आहे. ग्रीन हाऊस इफेक्टमुळेच सूर्याच्या प्रकाशातून शोषून घेतलेली ऊर्जा आणि परावर्तित ऊर्जा यांच्यात समतोल राखला जातो. पण गेल्या काही वर्षांपासून हा समतोल बिघडतो आहे. पृथ्वीच्या वातावरणात ग्रीन हाऊस गॅसेसचं प्रमाण वाढतं आहे. या गॅसेसचं प्रमाण वाढल्यामुळे पृथ्वीकडून परावर्तित होणारी सूर्याची ऊर्जा अंतराळात न जाता ग्रीन हाउस वायूंकडून शोषली जाते आणि पुन्हा पृथ्वीकडे पाठवली जाते. त्याचाच परिणाम म्हणून पृथ्वी आता जास्त तापू लागली आहे. पृथ्वीच्या अशा जास्त तापण्यालाच ग्लोबल वाॅर्मिंग असं म्हणतात.

ग्लोबल वाॅर्मिंग म्हणजेच जागतिक तापमान वाढीमुळे पृथ्वीवरल्या ध्रुवीय प्रदेशातला बर्फ वेगानं वितळू लागला आहे. या बर्फात पृथ्वीचं ७० ते ७५ टक्के शुध्द पिण्याचं पाणी असतं, ते असं बर्फ वितळत जाण्यामुळे आणि ते पाणी समुद्रात जात असल्याने समुद्राची पातळी वाढत आहे. वाढत जाणाऱ्या समुद्र पातळीमुळे मनुष्यजीवन धोक्यात आलं आहे. वातावरणातला ग्रीन हाउसचा नकारत्मक परिणाम वाढल्यामुळे हवामानात मोठ्या प्रमाणावर बदल होत आहे. ग्रीन हाऊसचा वाढता इफेक्ट आणि हवामान बदलाचा असा थेट संबंध आहे.