बी बस स्टाॅप माहीती आहे? मधमाशांसाठी बस स्टाॅप का बरं केला असेल?

मधमाशा काय करतात? असा प्रश्न विचारला तर उत्तर किती सोपं आहे. मधमाशा मध तयार करतात. पण मधमाशांचा एवढाच उपयोग असता तर घटत चाललेल्या मधमाश्यांच्या संख्येने जग चिंताग्रस्त झालं नसतं. झाडं, माणसं आणि प्राणी जगवण्याची ताकद या मधमाश्यांमध्ये असते. ९० जंगली वनस्पती आणि ७५ टक्के शेतातील पिकं ही मधमाशा करत असलेल्या परागीभवनाच्या क्रियेवर अवलंबून असतात. मधमाशांद्वारे होणारी ही परागीभवनाची क्रियाच झाली नाही तर जगभरातल्या वनस्पती नष्ट होतील. वनस्पतीच नसतील तर प्राणीजीवन आणि मनुष्यजीवनही अवघड होईल. त्यामुळेच मधमाशा असणं आणि त्यांनी परागीभवन करणं ही आवश्यक बाब आहे. आज जगात २ लाख कोटी मधमाशा आहेत. मधमाशांच्या २०,००० प्रजाती जगभरात आहेत. जिकडे फुलझाडं तिकडे मधमाशा. त्यामुळे जगभरात मधमाशा आहेत. फक्त अति थंड असलेल्या अंटार्क्टिकामध्ये ना वनस्पती आहेत ना प्राणी. तिथे झाडंच येत नाही, त्यामुळे तिथे मधमाशाही नाहीत. पण तेवढा भाग सोडला तर पृथ्वीवर सर्वत्र मधमाशा आहेत. पण वाढतं शहरीकरण, प्रदूषण, शेतीमध्ये किटकनाशकांचा वाढता वापर, मधमाशांचे अधिवास नष्ट होणं यासारख्या कारणांमुळे मधमाशांची संख्या घटते आहे.