येथे आमचं भविष्य सुरक्षित नाही म्हणत १६ मुलामुलींनी राज्यावरच भरला खटला!

काय झालं मोन्टानात?    

मोन्टाना राज्यात कोळसा या जिवाश्म इंधनाचा वापर होत आहे. मोन्टाना हे अमेरिकेतील कोळसा उत्पादनात अग्रेसर असलेलं राज्य आहे. तसेच येथे नैसर्गिक वायू निर्मितीही मोठ्या प्रमाणात केली जाते. कोळसा आणि नैसर्गिक वायू  यामुळे येथील लोकांना हवामान बदलाच्या धोकादायक परिणामांना सामोरं जावं लागत आहे. येथील हवा अशुध्द झाली आहे. पाणी अस्वच्छ झालं आहे.  येथील लोकांना प्यायला शुध्द पाणी मिळत नाहीये. अस्वच्छ पाणी प्रश्नामुळे येथील मासेमारीही धोक्यात आली आहे,  सतत दुष्काळ पडतो आहे, पाऊस कमी पडत आहे.. अशी या मुलामुलींची तक्रार आहे. त्यावर न्याय मिळवण्यासाठी ते मोन्टाना विरुध्द कोर्टात गेले आहेत.  हवामान बदल हा केवळ एकट्या मोन्टाना राज्याचा प्रश्न नाहीये, ही जागतिक समस्या आहे, हे येथील मुला मुलींना माहीत आहे. पण मोन्टाना राज्य जे घटनेत नमूद केलं आहे त्याच्याविरुध्द वागत असल्याने  ही मुलं मोन्टाना विरुध्द कोर्टात गेली.  हवामान बदलाबाबतत मोन्टाना शासनानं आपली जबाबदारी उचलावी हा त्यांचा आग्रह आहे. लोकांना आरोग्यदायी पर्यावरणात सुरक्षित जगण्याचा हक्क आहे, हे घटनेतच नमूद असल्याकारणानं ही केस कोर्टानं दाखल करुन घेतली आणि त्यावर सुनावणी घेण्यासही सुरुवात केली आहे.