करिना सॅम्युअलची बाय बाय प्लॅस्टिक बॅग्ज मोहीम काय आहे?

आपल्या डोळ्यासमोर अनेक गोष्टी घडतात. पण आपण अनेकदा त्याकडे दुर्लक्ष करतो किंवा आपण तर अजून लहानच आहोत मग आपण काय करणार, हे तर मोठ्यांचं काम असा विचार करुन सोडून देतो. पण करिना सॅम्युअलने मात्र असा विचार केला नाही. करिना सॅम्युअल ही भारतीय अमेरिकन मुलगी. ती अमेरिकेत राहाते. लहानपणापासून हवामान बदल म्हणजेच क्लायमेट चेंजबद्दल ती ऐकत होती. नुसतंच ऐकत नव्हती तर हवामान बदलाचे परिणामही ती पाहात होती, अनुभवत होती. सतत येणारे पूर, मोठी वादळं हा तर हवामान बदलाचाच परिणाम. सतत मोठे पूर येवून समुद्रातील कोरल रीफ (समुद्रातील प्रवाळ) धोक्यात येत आहे. त्याचा समुद्रातील जीवसृष्टीवर परिणाम होतोय. तसेच पूर, वादळं यामुळे आर्थिकदृष्ट्या गरीब लोकांवर त्याचा वाईट परिणाम होतोय. या लोकांना हवामान बदलाबद्दल जास्त माहिती नाही पण त्याचे वाईट परिणाम मात्र या गरीब लोकांच्या वाट्यालाच जास्त. पण त्यांना त्याबाबत काही बोलताच येत नाही. नैसर्गिक आपत्तींमुळे गरीब श्रीमंत असा भेद निर्माण होत आहे. या सर्व गोष्टी शाळेत जाणाऱ्या पण आजूबाजूच्या परिस्थितीबद्दल फारच जागरुक असणाऱ्या करिनाला कळत होत्या. पर्यावरणासाठी, पर्यावरण रक्षण, हवामान बदल याबाबत लोकांना माहिती देण्यासाठी आपण काम करायला हवं असं तिला वाटू लागलं.