भूमिती हा विषय बोअर अवघड वाटतो. भूमितीशी मैत्री कशी शक्य आहे?

' पण इंटरेस्ट वाटावं असं काय आहे भूमितीत?'

'सगळंच तर इंटरेस्टिंग आहे भूमितीत. तुला अभ्यासाचा कंटाळा आला की तू चित्र काढत बसतेस. तासनतास चित्रं काढलं तरी तुला कंटाळा येत नाही. का? कारण त्यात तुला इंटरेस्ट आहे. पण तुला हे माहीती आहे का, की तू काढत असलेल्या चित्रात, चित्रातल्या प्रत्येक रेषा, बिंदू आणि वर्तुळात भूमितीच तर आहे. हीच भूमिती तू आणखी नीट समजून घेतली तर तुझी चित्रकला आणखी छान होईल. '

' हे बघ मनू तू घरात थांब, नाहीतर बाहेर जा. जमिनीकडे बघ नाही तर वर आकाशात, विमानात बस नाहीतर जहाजाने प्रवास कर भूमिती तुझा पाठलाग करणारच. कारण सर्व गोष्टीत भूमितीच्याच संकल्पना वापरलेल्या आहेत. वैमानिकानं जर भूमितीचा अभ्यास केला नसता तर त्याला विमान ना आकाशात नेता आलं असतं, ना खाली उतरवता आलं असतं. खलाशाला जहाज चालवता आलं नसतं. कारण यात भूमितीच्या संकल्पनांचाच वापर केलेला आहे. आपल्या आजूबाजूला प्रत्येक गोष्टीत भूमितीच लपलेली असेल तर भूमितीपासून पाठ कशी सुटेल तुझी? तू स्वयंपाकघरात जावून डब्यातून लाडू काढ किंवा करंजी, नाहीतर पोळ्यांच्या डब्यातली पोळी या सर्व आकारात भूमिती आहे. हाॅटेलमधले आपल्यापुढे आलेले पदार्थ दिसायला छान नसते तर कोणी खाल्ले असते? हे पदार्थ छान दिसावेत यामागेही भूमितीतल्या संकल्पनाच आहे. तेव्हा तू भूमितीशी मैत्री कर. रेषा काय म्हणतात, बिंदू काय म्हणतात, वर्तुळ, परीघ, चौरस, आयत यांचे सिध्दांत समजून घे. या संकल्पना नीट समजल्या तर पुढे अवघड काय आहे? जोपर्यंत आपल्याला संकल्पना कळत नाही, तोपर्यंत विषय अवघडच वाटणार. भूमितीतल्या प्रत्येक संकल्पना नीट समजून घे बघ तुझी भूमितीशी मैत्री होते की नाही?