मी १३ वर्षांची नाही पण तरीही मी इन्स्टावर अकाउण्ट उघडलं तर काय बिघडलं?

आता आईच्या लक्षात आलं, की आरोहीला कसं सांगितलं की लक्षात येईल. ती म्हणाली,

“बरं ते जाऊ दे. मला एक सांग, तू एकटी कुठे कुठे जातेस?”

“अं? त्याचा काय संबंध आई?”

“सांग तर खरं. मग सांगते संबंध काय ते. तू एकटी कुठे कुठे जातेस?”

“अं… कॉलनीत मैत्रिणींशी खेळायला… कॉलनीत ड्रॉईंग क्लासला…”

“आणि?”

“शाळेत पण मी एकटीच जाते ना बसमध्ये बसल्यावर. तिथे तरी तुम्ही कुठे बरोबर असता?”

“बरोबर. अजून कुठे एकटी जातेस का?”

“नाही.” आरोही विचार करत म्हणाली.

“आता बघ हां, या सगळ्या ठिकाणी तू एकटी जातेस, पण तिथे सगळे लोक अनोळखी असतात का?”

“हॅट! सगळे ओळखीचे असतात माझ्या.”

“बरोबर ना? मग आता मला सांग, की जिथे सगळी मोठी माणसं आहेत, तीसुद्धा सगळी अनोळखी आहेत अशा ठिकाणी तू कधी एकटी गेली आहेस का?”

“नाही.”

“अशा एखाद्या ठिकाणी तू एकटी जाशील का? की जिथे सगळी अनोळखी मोठी माणसं आहेत. जी तुझ्या आईवडिलांच्याही ओळखीची नाहीत. आणि त्यातले काही जण त्यांचं नावसुद्धा खोटं सांगतात, इतर लोकांना फसवतात… अशा ठिकाणी तू एकटी, अगदी आईवडिलांशिवाय जाशील का?”

“हॅट! काहीही काय?”

“अजिबात ओळखीच्या नसलेल्या लोकांना तू तुझे फोटो, तुझ्याबद्दलची माहिती सांगशील का?”

“आई तू काहीही काय विचारतेस? असं कोणी करतं का?”

“का बरं नाही करत?”

“कारण असं करणं सेफ नाहीये. लहान मुलांना कोणी फसवू शकतं.”

“हो ना? मग इंस्टाग्राम सारख्या कुठल्याही सोशल मीडियावर पण हेच असतं बाळा. तुझं अकाऊंट म्हणजे तू एकटी तिथे जाणार. तिथे अनोळखी लोक तुझ्याशी बोलायला येणार. आणि अजून तुला त्यातले चांगले वाईट लोक ओळखू येत नाहीत. खरं म्हणजे तुझ्या वयाच्या कुठल्याच मुलांना ते समजत नाही.”