आपण झोपतो तेव्हा आपल्या शरीरात खूप काही घडतं! हे कसं शक्य आहे?

Image: freepik

आपण जागे असतो तेव्हा किती गोष्टी करतो. आपलं शरीर असंख्य वेळा हालचाल करतं असतं. आपण बोलत असतो, पाहात असतो, ऐकत असतो. बसतो, चालतो, पळतो, वाचतो, लिहितो, गाणी म्हणतो, गप्पा मारतो, गोष्टी ऐकतो, टीव्ही पाहातो, जेवतो, लोळतो, खेळतो... यादीतर काही संपतच नाही. एवढं करुन मग आपलं शरीर थकतं आणि रात्री आपल्याला झोप येते आणि आपण झोपून जातो. परत सकाळी उठल्यावर हेच चक्र सुरु. आता तुम्हाला विचारलं की झोपेत तुमच्या शरीरानं काय काय केलं? तर तुम्ही माझ्या या प्रश्नावर नक्की हसाल. मीही अशीच हसले होते. मलाही असंच वाटायचं की आपण झोपलो की शरीर काही करतच नाही. पण खरंतर झोपेत अनेक गोष्टी होत असतात. आता तुमचीही उत्सुकता वाढली ना?

हे वाचा!

झोपेत काय काय होतं?

आपल्या शरीराचं तापमान दिवसभरात सतत बदलत असतं. मध्येच ते वाढतं तर मध्येच ते कमीही होतं. पण आपण झोपतो तेव्हा आपल्या शरीराचं तापमान २ ते ३ डिग्रीने कमी होतं. झोपल्यानंतर आपल्या शरीरात मेलॅटोनिन नावाचं एक महत्वाचं हार्मोन स्त्रवतं. आपल्या शरीराचं जैविक घड्याळ सांभाळण्यासाठी हे हार्मोन फार महत्वाचं असतं.

आपल्याला झोप लागली की शरीराची आतून स्वच्छता व्हायला सुरुवात होते. शरीर आतील विषारी घटक बाहेर टाकण्यासाठी काम करतं. शरीर आतील खराब झालेले रेणू बाहेर टाकतं. हे घडलं की मग आपलं शरीर आणि आपला मेंदू ताजातवाना आणि टवटवीत होतो. आणि जर आपण झोपलोच नाही किंवा आपण पुरेशी झोप घेतली नाही तर मेलॅटोनिन हार्मोन वर परिणाम होतो तसंच आपल्या शरीरातील विषारी घटकही बाहेर टाकले जात नाही.

झोपेत आपल्या शरीरातील दमट हवा बाहेर पडते. घाम येवून शरीरातील अनावश्यक पाणी बाहेर पडतं. त्यामुळे आपलं वजन संतुलित ठेवण्यासाठी म्हणजे आपला वजनावर कंट्रोल ठेवण्याचं काम झोपेत घडतं. झोपेत आपलं शरीर भुकेवर परिणाम करणाऱ्या हार्मोनवर नियंत्रण मिळ्वण्याचा प्रयत्न करत असतं. शरीराचं हे काम व्यवस्थित होण्यासाठी जी झोप आवश्यक आहे ती जर झाली नाही तर मात्र आपल्याला दुसऱ्या दिवशी वेफर्स, कुरकुरे सारखे जंक्स फूड खावेसे वाटतात.

Image: freepik

झोपेत आपल्याला स्वप्नं पडतात.  आपण झोपेत रोज साधारण दोन तास स्वप्नं पाहातो.

आपली उंची वाढतेय हे आपल्याला जागी असताना कळतं का? उंची कधी वाढते हे तर आपल्याला कळतही नाही. आपली उंची ही झोपेत वाढत असते. झोपतो तेव्हा आपल्या मणक्यांमधल्या चकतीवरचा दाब निघून जातो तसेच ती पाणी शोषते. यामुळे ती मोठी होते आणि त्यामुळे आपली उंची वाढण्यास मदत होते.

एकदा झोपलो की आपलं शरीर अजिबातच हालचाल करत नाही असं आपल्याला वाटतं. पण प्रत्यक्षात आपलं शरीर खूपदा हालचाल करतं. आपण झोपेत अनेकवेळा एका कुशीवरुन दुसऱ्या कुशीवर वळत कूस बदलतो. झोपेत स्नायू आखडतात आणि अचानक शरीराला झटका बसतो. असे झटके आपल्याला झोपेत खूप वेळा बसतात. हे झटके बसतात हे आपल्याला जाणवतही नाही. तर कधीकधी आपल्याला जाणवतील असेही झटके बसतात. आपल्याला जागही येते. पण अगदी थोडा वेळ. आपल्याला झोपेत जाग आली होती हे उठल्यानंतर आठवत देखील नाही.

आपली त्वचा निरोगी, चमकदार, आणि लवचिक होण्याचं कामही झोपेतच होतं. कारण आपण झोपतो तेव्हा कोलॅजनची निर्मिती होते. हे कोलॅजन म्हणजे एक प्रकारचे प्रथिनंच म्हणजे प्रोटिन्स असतात. आपण झोपतो तेव्हा कोलॅजनची निर्मिती होते, त्याचं प्रमाण वाढतं.

एकदा झोपलो की सकाळीच जाग येते असं नाही. तर झोपेत असताना आपल्याला कमीत कमी १५ वेळा जाग येते.

काय वाटलं वाचून ? मजा आली? नवीन काहीतरी कळलं ?प्रश्न पडले?... लग्गेच कळवा! - कसं कळवणार ?

व्हाॅट्सॲप मेसेज करा : ९११२०५०५००

ईमेल पाठवा : urjaa.online@gmail.com 

क्लिक करा, मेसेज लिहा :https://urjaa.online/contact

आईबाबा बघावं तेव्हा हातात फोन घेऊन बसलेले असतात, मी फोन हातात घेतला की मात्र मला बोलतात. त्यांनी फोन बघितलेला चालतो, मग मी का नाही?

- साजुली वडनेरे

-आईबाबा सतत फोन वापरतात म्हणजे त्यावर फक्त टाईमपास करतात असं नाही. हल्ली ऑफिसची बरीचशी कामं ही मोबाइलवरच सुरु असतात. कदाचित घरी असतानाही आईबाबांना मोबाइलवरुन ती कामं करणं आवश्यक असतं. तो त्यांच्या ऑफिसमधल्याच कामाचा भाग असतो. त्यामुळे त्यांना मोबाइल बघण्याची इच्छा नसली तरी त्यांना तो पाहावाच लागतो. या मोबाइलमुळेच हल्ली आई बाबा ऑफिसमधून घरी आले तरी घरी आल्यासारखे वाटतच नाही.

आपल्याशी ते गप्पा मारत असले, खेळत असले किंवा आपण मस्त एकत्र बसून चित्रपट पाहात असलो, जेवत असलो तर मध्येच आई किंवा बाबांना फोन येतात. मग ते कामाचे असले की घ्यावेच लागतात. एवढंच कशाला घरी असताना कामाचे फोन आले की हातातली कामं सोडून आई बाबांना अनेकदा लॅपटाॅप उघडून काम करावं लागतं. यामुळे आपला जसा हिरमोड होतो तसा त्यांचाही होतो. घरी आल्यावर त्यांना आपल्यासोबत वेळ घालवायचा असतो. पण कामाला नाही म्हणता येत नाही. हा त्यांचा नाईलाज असतो. त्यामुळे आई बाबा जेव्हा मोबाइल पाहात असतात तेव्हा प्रत्येक वेळी ते टाइमपासच करत असतात असं नाही.

हेही वाचा!

- आई बाबांच्या मोबाइलवर तुझ्या शाळेचा, शिक्षकांचा, तुझ्या मित्र मैत्रिणींच्या पालकांचाही ग्रुप असेल. त्यावर आलेल्या सूचना, माहितीही आईबाबांना बघावी लागत असणारच.

मुलांनी अभ्यास वह्या पुस्तकातूनच करायचा असतो. त्यामुळे विरंगुळा म्हणून थोडावेळ तू मोबाइल बघितलास तर आईबाबा ते समजून घेतात. पण तू जर जास्तच वेळ मोबाइल पाहाण्यात घालवलास तर ते तुला रागावणारच.

- मोबाइल बघण्यात वेळ घालवण्यापेक्षा अभ्यास करणं, मैदानावर जाऊन मित्रमैत्रिणींसोबत खेळणं, पुस्तकं वाचणं हे तुझं आत्ता सगळ्यात महत्त्वाचं काम आहे. तू ते करावं अशी इच्छा आईबाबांची असते.

-लहान मुलांनी सतत मोबाइल बघितला तर त्याचे त्यांच्या डोळ्यांवर, बुद्धीवर, वाढीवरही दुष्परिणाम होतात. त्यामुळे आईबाबा जरी मोबाइल बघत असले तरी आपण मात्र तो कमीच बघावा, त्यातच आपला फायदा आहे.

काय वाटलं वाचून ? मजा आली? नवीन काहीतरी कळलं ?प्रश्न पडले?... लग्गेच कळवा! - कसं कळवणार ?

व्हाॅट्सॲप मेसेज करा : ९११२०५०५००

ईमेल पाठवा : urjaa.online@gmail.com

क्लिक करा, मेसेज लिहा :https://urjaa.online/contact