सुटीच्या दिवशी आंघोळीला बुट्टी दिली तर काय बिघडतं?

सुट्टीच्या दिवशी मुलांना काय करावंसं वाटतं माहितीये का? सगळ्यात पहिली गोष्ट म्हणजे सकाळी लौकर उठायचं नाही. म्हणजे कोणीच मुलांना सकाळी लौकर उठवायचं नाही. आम्हाला जाग येईल तेव्हा उठू द्यायचं. दुसरं म्हणजे उठल्या उठल्या “दात घास” असं म्हणून कोणी मागे लागायचं नाही. आम्ही आता मोठे झालोय आणि आपल्याला रोज सकाळी दात घासावेच लागतात हे आम्हाला समजलेलं आहे. आणि त्याहीपेक्षा महत्वाचं म्हणजे दात घासल्याशिवाय आम्हाला कोणीच काहीच खायला देणार नाही हे आम्हाला माहिती असतं. त्यामुळे आम्ही दात घासणारच असतो. त्यासाठी सकाळी उठल्यापासून रागवायला सुरुवात करायची काहीच गरज नसते. तिसरी गोष्ट म्हणजे नाश्त्याला आणि जेवायला काहीतरी छान केलं तर आम्हाला पाहिजे असतं. पण… या तीन गोष्टींबाबत आमची काही फारशी तक्रार नाहीये. कारण या तीन गोष्टी कधी ना कधी आम्हाला करायला मिळतात. कधीतरी उशिरापर्यंत लोळायला मिळतं. आई तिला जमेल तेव्हा काहीतरी छान खायलापण करते. आणि त्या वासाने आम्ही आपोआप दात घासायला जातोच. आमची तक्रार आहे ती चौथ्या मुद्द्यावर. आणि तो मुद्दा आहे… आंघोळ!