ग्रीन हाउस इफेक्ट कमी करण्यासाठी आपण काही करु शकतो का?

हवामान बदलास ग्रीन हाऊस गॅसेसचं वाढलेलं प्रमाण कारणीभूत ठरत आहे, हे आता संशोधनातून सिध्द झालं आहे. कोणत्याही गोष्टीचा जेव्हा वैज्ञानिक पध्दतीने विचार केला जातो, तेव्हा फक्त समस्यांवरच चर्चा होते असं नाही, तर समस्या कमी करणाऱ्या उपायांबद्दलही बोललं जातं. त्यामुळे पृथ्वी भोवतालच्या वातवावरणात ग्रीन हाऊस इफेक्ट वाढला आहे, हे जसं सत्य आहे, तसंच हा इफेक्ट कमी करणारे उपायही आहेत, जे माणसाच्या हातात आहे. ग्रीन हाऊस गॅसेसचं उत्सर्जन कमी करण्यासाठी वैयक्तिक पातळीवर, सामुहिक पातळीवर. देश आणि आंतरराष्ट्रीय पातळीवर प्रयत्न करावे लागतील. ग्रीन हाऊस गॅसेसचं वाढणारं प्रमाण रोखण्याचे दोन मार्ग आहेत. एक म्हणजे हवेत हे वायू जास्त प्रमाणात मिसळणार नाही यासाठी प्रयत्न करणे आणि दुसरा मार्ग म्हणजे वातावरणातले/ हवेतले हे वाढलेले वायू बाहेर काढण्यासाठी पृथ्वीची क्षमता वाढवणे.

वातावरणातले ग्रीन हाऊस गॅसेसचं वाढलेलं प्रमाण कमी करण्यासाठीच्या उपायांची अंमलबजावणी जगभरात सुरु झाली आहे. पण त्याचं प्रमाण कमी आहे. काहीजण वैयक्तिक पातळीवर प्रयत्न करत आहेत, काही जण सामुहिकपणे उपाय योजत आहेत तर काही देशांनी यासाठीचं एक धोरण ठरवून ते अमलात आणण्याचं काम सुरु केलं आहे.