एवढं ऊन पडतं आपल्याकडे, आपण काय करतो त्याचं?

'आजकाल ऊन किती वाढलं आहे' , किंवा 'आजकाल वर्षभरात केंव्हाही पाऊस पडत असतो',

अशी जी वाक्यं अधूनमधून आपण ऐकतो/बोलतो, त्यांचा वातावरणीय बदलांशी काही संबंध असेल का?

गेल्या काही वर्षांची आकडेवारी तपासून, इतर अभ्यास पाहून तज्ज्ञ नक्कीच यावर काही भाष्य करत असतात. चर्चा होतात. उन्हाळ्याच्या सुट्टीत 'चला, आता फिरायला जाऊ' , म्हटल्यावर, 'ऊन पाहिलं का किती आहे', हा पहिला डायलॉग असतो. उन्हापासून काय खबरदारी घ्यावी, याचे फॉरवर्ड्स सारखे येत असतात मोबाइलवर. सगळीकडे पर्यावरण ऱ्हास, हवामान बदल, ग्लोबल वॉर्मिंग, वगैरे मोठाले शब्द कानी पडतात. शाळेत-कॉलेजला 'इव्हीएस' हा विषय काहीतरी कॉपी पेस्ट प्रोजेक्ट करण्यापुरता नसतो. पाणी वाचवा, जंगल वाचावा, वाघ वाचावा, वीज वाचावा, कचऱ्याचे वर्गीकरण करा, झाडं लावा, वगैरे विषयांवर निबंध स्पर्धा घेऊन, चित्रं काढून, सार्वजनिक भिंती रंगवून, घोषवाक्यं लिहून, कॉपीपेस्ट प्रोजेक्ट करून निसर्ग वाचणार आहे का? की दरवर्षी स्पर्धा तीच, विषय तेच, विद्यार्थी वेगळे, असंच होणार आहे? म्हणूनच किमान आपल्या स्तरावर काही वेगळं, थोडं सखोल आपण काही करून बघू शकतो का? निबंध, चित्रं, घोषवाक्यं लिहिणं आपल्याला त्या- त्या विषयांची माहिती देऊ शकते, जाण वाढवू शकते, गोडीही लावू शकते. परंतु, या सर्व गोष्टींना कृतीची जोड असेल, तर पर्यावरण संवर्धनात आपलाही खारीचा वाटा उचलला जाईल.