तनिषाच्या एका चुकीने समुद्रातील डाॅल्फिनचा झाला संताप!

तो प्लॅस्टिकचा रिकामा पुडा आणि प्लॅस्टिकची रिकामी बाटली तनिषाच्या समोर तरंगत तरंगत बोटीपासून जरा लांब गेले. पण तिचं त्याकडे अजिबात लक्ष नव्हतं. ती आपली मोबाईलच्या कॅमेऱ्याचा अँगल ऍडजस्ट करणं, त्यात आपलं स्माईल छान येतंय का पाऊट भारी दिसतोय याचा विचार करणं आणि इतर लोक कुठल्या दिशेला डॉल्फिन शोधतायत याचा अंदाज घेणं यात बिझी होती.

तिने मोबाईलमधून बाहेर बघून जरा जरी समोर लक्ष दिलं असतं, तरी तिला दिसलं असतं, की त्या तरंगणाऱ्या वेफर्सच्या पुड्याच्या आणि सॉफ्ट ड्रिंकच्या बाटलीच्या खाली, समुद्रात खूप जोरात खळबळ होत होती. आणि ते जे कोणी खाली खळबळ करत होतं, ते कुठल्याही क्षणी उसळी मारून बाहेर आलं असतं.

तनिषाच्या बोटीतली माणसं एका बाजूला डॉल्फिन बघत होती आणि तनिषा सेल्फीफ्रेम आणि अँगल सेट करायची खटपट करत होती तेव्हा त्यांच्या बोटीच्या अगदी जवळ असणाऱ्या एका लहान वयाच्या नोझी नावाच्या डॉल्फिनचा संताप संताप झाला होता. त्याच्या नाकाच्या छान आकारामुळे बाकीचे डॉल्फिन्स त्याला लाडाने नोझी म्हणायचे. शिवाय काही डॉल्फिन्सचं असंही म्हणणं होतं, की तो त्याचा संबंध नसलेल्या गोष्टींमध्ये नाक खुपसतो. त्याही कारणाने काही डॉल्फिन्स त्याला नोझी म्हणायचे. आणि आत्ता त्याचं तेच छान शेप असणारं, आणि ज्या त्या विषयात खुपसायला कमी येणारं नाक वर करून तो समुद्राच्या आतून वर आकाशाकडे बघत होता. त्याला दिसत होतं, की परत कोणीतरी त्याच्या समुद्रात, त्याच्या घरात घाणेरड्या प्लास्टिकचा कागद आणि बाटली टाकली होती.