लिसिप्रिया कंगजूमने जगभरातल्या सरकारांना काय ठणकावून सांगितले?

पूर, वादळं ही नैसर्गिक संकटं लिसिप्रिया खूप लहान होती तेव्हापासून पाहाते आहे. ती सध्या दिल्लीता राहात असली तरी तिचा जन्म ईशान्य भारतात. मणिपूरमधील बाशिखाॅंग या गावात झाला. वादळं, पूर यामुळे पडणारी, वाहून जाणारी लोकांची घरं, मरणारी लोकं लिसिप्रियानं लहानपणापासून बघितली आहेत. हे बघून तिला खूप वाईट वाटलं. तेव्हापासून आपण काहीतरी करायला हवं असं लिसिप्रियाला वाटायचं. तेव्हा ती अगदीच चिमुकली होती. आपण पर्यावरणासाठी काम करायला हवं हा तिचा निर्धार पक्का झाला तो ती आठ वर्षांची असताना, २०१८ मध्ये. तेव्हा ती तिच्या वडिलांसोबत मंगोलियामध्ये उलनबातार येथे 'एशिया मिनिस्ट्रिअल काॅन्फरन्स फाॅर डिझास्टर रिस्क रिडक्शन' या परिषदेसाठी गेली होती. तेव्हा तिने तिथे विविध वक्त्यांची भाषणं ऐकली. या भाषणांचा लिसिप्रियाच्या मनावर खूप परिणाम झाला. तेव्हा तिनं पर्यावरण रक्षणासाठी, हवामान बदल रोखण्यासाठी काम करण्याचा आपला निर्धार पक्का केला. याच परिषदेत लिसिप्रियाने आपलं पहिलं भाषण केलं. हवामान बदलाने कशा नैसर्गिक आपत्ती येत असून आता जगभरातल्या सरकारने यावर काम करणं कसं गरजेचं आहे यावर ती बोलली. एवढीशी मुलगी किती मोठ्या विषयावर सहज बोलते आहे हे बघून तिथे उपस्थित असलेले सर्वच जण प्रभावित झाले. तेव्हा भारतातल्या एका छोट्याशा खेड्यातून आलेल्या मुलीची ओळख जगाला झाली.