अवतीभवतीचे प्रश्न मांडण्यासाठी जॅडनने लिहिले काॅमिक बुक !

किड ब्रूकलीन हे जॅडेनच्या काॅमिक बुकचं नाव. या काॅमिक बुक्समधील पात्र म्हणजे ब्रुकलीन शहरातले जॅडेनसारखी मुलं. यात स्वत: जॅडेन हा देखील एक पात्र आहे. बाकीची पात्रं म्हणजे जॅडेन याची लहानपणापासूनची मित्र मंडळी आहेत. यातलं एक पात्र फक्त काल्पनिक आहे. बाकीची सर्व पात्रं खऱ्याखुऱ्या जगातली किंबहुना जॅडेन स्वत: आणि त्याची मित्रमंडळीच होती. या काॅमिक बुकमधून जग बदलण्याची क्षमता मुलांमध्ये असते हे तर जॅडेनला सांगायचं होतंच सोबत अभ्यास करताना विज्ञान, तंत्रज्ञान, इंजिनिअरिंग, गणित हे विषय खूप महत्वाचे असतात. आपल्याला जगात खरंच काही बदलायचं असेल काहीतरी करुन दाखवायचं असेल तर या विषयांचा अभ्यास करणं गरजेचं असतं असं जॅडेनला आणि त्याच्या मित्रांना जगभरातल्या मुलांना सांगायचं होतं. स्वत: जॅडेन ज्या शाळेत शिकत होता त्या शाळेत विज्ञान, गणित, कम्प्युटर सायन्स या विषयांना अतिशय महत्व दिलं जात होतं. आणि हे विषय जॅडेनच्याही आवडीचे होते. या काॅमिक बुकमध्ये आपल्या खऱ्या खुऱ्या मित्रांचा समावेश केल्याने जॅडेनच्या मित्रांना खूप आनंद झाला. त्यांना त्याबद्दल खूप उत्सुकताही वाटायला लागली.