लहान मुलांनाही टेन्शन येतं? इतक्या लहान वयात मुलांना कसला ताण येतो?

लहान मुलांनाही अनेक गोष्टींचं टेन्शन येऊ शकतं. तसं ते अनेकदा येतंही. काही वेळा हा ताण तेवढ्यापुरता असतो आणि मग तो जातो. पण काही वेळा मात्र सतत तणावाखाली राहिल्यामुळे मुलांचं फार नुकसान होऊ शकतं. शिवाय या टेन्शनचा सगळ्यात मोठा लोचा काय असतो माहितीये का? की एखादा मुलगा जे करतोय ते टेन्शनमुळे करतोय हेच मुळी कोणाला समजत नाही. म्हणजे बघा हं, समजा घरी पप्पा अचानक खूप चिडचिड करायला लागले तर आई काय म्हणते, 'त्यांना ऑफिसचं टेन्शन असेल.' बरोबर ना? पण जर का सहावीतला मुलगा अचानक खूप चिडचिड करायला लागला तर काय होतं? सगळे म्हणतात, 'हल्ली फार आगाऊ झालाय तो.' ही चीटिंग आहे यार. पप्पांना टेन्शन असतं तर मुलांना असू शकत नाही का? तर नक्कीच असू शकतं. पण होतं काय? की मुलांना असं टेन्शन येतं हेच मुळी मोठ्या माणसांना माहिती नसतं. पण टेन्शन आलं की आपल्या वागण्यात, सवयीत बदल होतो, जो आपण सहज ओळखू शकतो. हे बदल टिपून तुम्ही तुमच्या मित्र मैत्रिणीलाही कसलं टेन्शन आलं का हे ओळखू शकता.